Саранскяйса 19 сентябрьста котоце созывонь МР-нь Государственнай Собраниять кеветиеце сессиясонза етась Владимир Дмитриевич Волковонь Мордовия Республикань Оцюнять должностьс сувамац.
Торжественнай церемонияса участиянь примаманкса Мордовияв састь Приволжскяй федеральнай округса РФ-нь Президентть полномочнай представителенц заместителец Алексей Сухов, РФ-нь Федеральнай Собраниянь Федерациянь Советонь члеттне, РФ-нь Государственнай Думань депутаттне, властень федеральнай органонь вятихне, Самарскяй областень губернаторсь Николай Меркушкин, Пензенскяй областень губернаторсь Иван Белозерцев, Татарстан, Чувашия республикань, Саратовскяй областень делегациятне.
Кочкамань итокнень, конатнень эса сяськсь В.Д.Волков, азозень МР-нь Центральнай избирательнай комиссиянь председательсь Александр Косов.
Владимир Волков азозень присягань валхнень: «Максан вал Мордовия Республикань Оцюнянь полномочиятнень пяшкотькшнемста уважандамс и ваномс ломанть и гражданинть праванзон, кирдемс Российскяй Федерациянь Конституцияти, федеральнай закоттненди, Мордовия Республикань Конституцияти и Мордовия Республикань закоттненди, совестьс коре пяшкотькшнемс лангозон путф обязанносттнень, видекс-правдакс служамс Российскяй Федерациянь народти».
Владимир Дмитриевиченди государственнай символть – Мордовия Республикань Знакть максомда меле, сон официальнайста сувась Мордовия Республикань Оцюнять должностьс.
Мордовиянь Оцюнять лемс сась поздравительнай телеграмма Россиянь Правительствать Председателенц, «Единая Россия» партиять председателенц
Д.А.Медведевонь эзда, конань лувозе МР-нь Госсобраниять Председателец Владимир Чибиркин.
Эсонза корхтави: «Уважаемай Владимир Дмитриевич!
Поздравляндате Тонь Мордовия Республикань Оцюнять постс кочкамать мархта!
Сяськомаце корхтай Мордовия Республикань эряйхнень ширде оцю довериять, регионца «Единая Россия» партиять оцю авторитетонц колга.
Надиян, што сяда товга кармат путнемост сембе вийхнень республикать виияфнеманкса и эрявикс социальнай программатнень эряфс етафнеманкса.
Арьсян Тееть кеме шумбраши и сембе цебярть».
Российскяй Федерациянь Федеральнай Собраниянь Федерациянь Советть Председателенц В.И. Матвиенкоть телеграммаса корхтави: «Уважаемай Владимир Дмитриевич!
Поздравляндате Мордовия Республикань Оцюнять должностьс сувамацень мархта!
Кеман, што Тонь профессионализмаце и опытце лездыхть решандамс Мордовиять социално-экономическяй виияйнеманц коряс задачатнень, цебярьгофнемс ломаттнень эряфснон.
Надиян, што Российскяй Федерациянь Федеральнай Советонь Федерациянь Советть Мордовия Республикань государственнай властень оргаттнень мархта сотрудничендамац сяда товга кармай водендаф Российскяй государственностть кемокснеманкса.
Арьсян сатфкст Россиять панчфокс панжеманкса работаса!
Валентина Ивановна Матвиенко».
«Единая Россия» партиянь фракциять вятиенц васенце заместителец, аграрнай кизефкснень коряс Госдумань комитетть членоц, муниципальнай образованиянь Общественнай конгресть Президентоц Виктор Кидяев лувозе Россиянь Государственнай Думать Председателенц В.В.Володинонь приветственнай адресонц.
Эсонза корхтави: «Уважаемай Владимир Дмитриевич!
Региононь эряйхне эсь вайгялень максомаснон мархта макссть оценка Мордовия Республикань Оцюнять должностьса улемста Тонь трудценди. Нажятькшнемок макссеви доверияти, Тееть ули кода виияфнемс республикать, решандакшнемс ломаттнень эряфснон цебярьгофнеманц мархта сотф кизефкснень.
Арьсян Тееть кеме шумбраши и сатфкст сембе тефнень эса.
Уважения мархта Вячеслав Викторович Володин».
ПФО-са Россиянь Президентть полномочнай представителенц Михаил Бабичень поздравлениянц лувозе Алексей Сухов: «Уважаемай Владимир Дмитриевич!
Поздравляндате Мордовия Республикань Оцюнять должностьс официальнай сувамацень мархта!
Региононь исполнительнай властень оргаттнень эса руководящай вастонь занцемста Тон сатоть цебярь результатт, конат сотфт республикать инновационнай ширде вииякшнеманц и сонь экономиканц традиционнай отраслянзон ширеснон кирнемаснон мархта. Мордовиянь Технопарксь, светотехническяй кластерсь, фармацевтическяй отраслясь – сембе тя ширетне вешихть аф аньцек оцю финансовай ширень кирдема, но и оцю квалификациянь специалистонь аноклама. Тяка пингть республикась лядонды Приволжьянь ведущай агропромышленнай регионкс. Мордовиясь
тячи обеспечендакшнесыне эсь эряензон велень хозяйствань продукцияса, лисенди общероссийскяй и омба масторонь рынкатненди.
Кеман, што международнай оцю мероприятиясь – 2018 кизонь футболть коряс миронь чемпионатсь Мордовияса етай оцю уровеньца. Максы возможность масторлангонь разнай уженяста ломаттненди содафтомс республикать мазышинц и инжиень примаманц мархта, кемокстасыне внешнеэкономическяй и внешнеполитическяй соткснень.
Арьсян Тееть сатомс арьсефть, ванфтомс и ламолгофнемс сатфть. Бабич Михаил Викторович».
Мордовскяй митрополиянь оцюнясь, Саранскяй и Мордовскяй митрополитсь Зиновий лувозе Москувонь и сембе Русень Патриархть Кириллонь поздравлениянц: «Уважаемай Владимир Дмитриевич!
Седи ваксста поздравляндате Мордовия Республикань Оцюнять должностьс кочкамать мархта!
Кочкаматнень эса сяськомаце корхтай эряйхнень оцю доверияснон, регионть социальнай и экономическяй прябаланзон решандамаса сатфкснень колга.
Спасибан Тееть республикань властть Мордовиянь митрополиять и Русскяй православнай церькавть мархта сотрудничендаманц инкса.
Арьсян Тееть кеме шумбраши и мир, Шкаень лезкс, сатфкст тевсот.
Уважения мархта Кирилл – Москувонь и сембе Русень Патриархсь».
Стане жа Мордовиянь Оцюнять поздравляндазь Николай Меркушкин, Иван Белозерцев, «Евроцемент групть» директоронь советонц председателец Филарет Гальчев, Мордовия Республикань Почетнай граждаттне Эвир Баксимер, Иван Андин, Владимир Ипатенко, Валентина Самарова, международнай предметнай олимпиадань ламонь-крдань сяськись Иван Утешев.
Эсь ширденза Владимир Волков поздравляндазе Эвир Аврамович Боксимеронь 80 кизонь топодеманц мархта, конань сон праздновандасы 19 сентябрьста.
Пуромфнень инголе выступандамста Мордовиянь Оцюнясь азсь благодарностень валхт республикань сембе эряйхненди максф довериянкса и ширень кирдеманкса, а стане жа странань руководствати республикать виияфнеманц коряс кизефкснень решандамаса шарьхкодеманкса, и васендакиге Россиянь Президентти Владимир Владимирович Путинонди.
«Спасибамань валхт мялезе азомс Российскяй Федерациянь Правительствати, Дмитрий Анатольевич Медведевонди, «Единая Россия» партияти, Федерациянь Советонь члеттненди и председательти Валентина Ивановна Матвиенкоти, Государственнай Думань депутаттненди и председательти Вячеслав Викторович Володинонди».
Владимир Волков китькстазе, што ламоц проекттнень удалась етафтомс эряфс ПФО-са Россиянь Президентть полномочнай представителенц Михаил Викторович Бабичень ширень кирдеманц вельде.
«Мон кенярдян, мес тячи тя залса няйса Президентть Полномочнай Представителенц Алексей Петрович Суховонь. Мон стане жа приветствовандасайне эсь коллеганень и ялганень – Самарскяй областень губернаторть Николай Иванович Меркушкинонь и Пензенскяй областень губернаторть Иван Александрович Белозерцевонь, Татарстанонь, Чувашиянь, Саратовскяй областень руководствать представительснон. Спасиба теенть лама кизонь пользань канни сотрудничендамантень инкса, - поладозе МР-нь Оцюнясь. – Мялезе спасибамс тя залса пуромф сембе оцю инжихненди, конат отвечасть тердеманьконь лангс. Оцю спасиба сембонди поздравлениянкса и пара валонкса!»
В.Д.Волковонь валонзон коряс, Мордовиясь сатсь аф емла сатфкст экономикаса и социальнай сфераса. «Сядонга оцю работа учендсамазь
инголе. Мон кочкайне эстейне и камандазенди инь оцю задачатнень, конатнень решандамаснон лангса сави работамс маластонь вете кизотнень. Аноклаф действиянь Программа, - отмечазе сон. – Мордовиять касондомац-вииякшнемац обеспечендави аньцек вии экономикать пингста, кона пуропневи од содамошитнень, инновационнай промышленностть, передовой технологиятнень тевс сувафнемаснон вельде.
Республикать сяда товолдонь виияфнемац видеста сотнеф конкуренциянь кирнемать мархта. Эряви касфнемс экспортть и инвестиционнай потенциалть, обеспечендамс трудть производительностенц касондоманц».
Стане жа Владимир Волков отмечазе, што сави пяшкодемс несколька высокотехнологичнай проект промышленностьса, строительстваса и велень хозяйстваса. Тиемс инь оцю аськолксть наукоемкай, цифровой экономикать пуроптоманкса.
«Кеман, што видексоннет аньцек ся решениятне, конат молихть ломаттнень интересснон эзда. Мордовиять цебярьста эрямац – тя башка сявф эрь семьять, эрь ломанть цебярь эряфоц, - мярьгсь Мордовиянь Оцюнясь. – Минь сяда товга карматама тиендемонза семботь, штоба обеспечендамс социальнай гарантиятнень и ломаттнень безопасностьснон, касфнемост зарплататнень, панчсема од рабочай вастт, виияфнемост образованиять и здравоохранениять, кирнема культурать и спортть ширеснон. Башка мяль шарфттама республикань эряйхнень наказснон пяшкодемаснонды. Васендакиге сятнень, конат сотфт доступнай эряма васттнень и качественнай китнень строямаснон, жилищно-коммунальнай хозяйствать работанц цебярьгофнеманц, эрямань цебярь условиятнень тиендемаснон мархта».