Владимир Волков примась участия производственнай од площадкатнень презентациясост, конат участвондайхть «Ардатовский светотехнический завод» ОАО-ть перевооружениянь программанц коряс инвестиционнай проектть эса. Производственнай ня участкатне нолдавихть тевс светонь LED источникнень мархта полупроводниковай осветительнай приборхнень производствасост.
Инвестпроектсь водендаф промышленнай сфераса импортонь полафнеманкса и вельдонза ули кода тиемс модернизация металлообрабатывающай производствати, нолдамс тевс давления ала алюминийть литьянц коряс од технологиятнень, ушедомс светонь LED источникнень мархта полупроводниковай и оптоэлектроннай приборхнень массовай производстваснон. Программать эряфс етафнемац полафтсыне тяфтама производительхнень продукцияснон кода «Филипс», «Осрам», Юго-Восточнай Азияста фирматнень и касфтсы Россиянь рынкаса «АСТЗ» ОАО-ть продукциянц пяльксонц.
Республикань вятись Владимир Волков ванозень заводть производственнай участканзон, корхнесь работникнень мархта. «АСТЗ» ОАО-нь директоронь советть председателец Владимир Кудашкин пачфтезе Мордовиянь лидерти, што май ковста заводса арьсекшневи нолдамс 240000 светодиоднай модуль. Мзярс светодиоднай светильниконь тя компоненттнень предприятиясь рамсесыне омба масторста. 2017 кизоть песта ушедови светильникнень производствасна эсь технологиятнень тевс нолнезь. Владимир Волков отмечазе, што тяниень пингонь оцю конкуренциянь экономикась путни од задачат промышленнай комплексть инголе. Васенце задачась сотнеф сянь мархта, што тяниень пингонь условияса васенце вастс лихневи аф аньцек модернизациять етафнемац и промышленностьса нолневи продукциять касфнемац, но, васендакиге, трудть производительностенц касфнемац. Призводствать роботизацияц и автоматизацияц коль сяда пяк кармай полафнемонза производственнай процесснень эса «ломанень» факторть, занцемок коль сяда оцю васта производстваса. Одкстоптф предприятиятнень эса кирьфтави работайхнень лувкссна, конат заняфт низкоквалифицированнай трудса. Тянь эзда лисенди омбоце задачась, кона ащи сянь эса, што тяниень пингонь высокотехнологичнай производстваса касонды вешфкссь оцю образованность и квалифицированность мархта персоналт эса. Сяс, ащи задача анокламс инженерно-техническяй кадрат, конатненди вийс коре нюрьхкяня пингста мушендомс васта экономикать курокста полафни вешфксонзон пингста, фалу касфнемс трудонь производительностьснон. Тяфтама работниконь анокламась ащи высшай и средне-специальнай образованить ответственностьснон ала, конат должетт отвечамс кадрань анокламать коряс тяниень пингонь высокотехнологичнай производстватнень вешфксснонды.
«Кда тяда инголе панчсевсть завотт тежятть работник мархта, то тяни модернизационнай предприятияса 100-300 заняфне нолнихть сняра жа продукция, мзяра тяда инголе ня тежяттне. Тяни тежятть заняф мархта 1-2 производстватнень вастс эрявихть сядот работник мархта кемотть предприятият, но сяда оцю зарплата мархта, мезсь сатневи трудть производительностенц касфнеманц вельде», - шарфтсь мяль Владимир Волков.