Спортивнай якамань мордовскяй школась эряй и кармай эряма. Тяфтама заявления тись Мордовиять вятиец Владимир Волков 15 августста легкай атлетикать коряс международнай пялькстомань сяськихнень и призерхнень мархта васедемста.
Республикань лидерсь поздравляндазень олимпийскяй резервань спортивнай школань воспитанникнень мировой аренаса цебярь сатфксонь сатомать мархта. Легкай атлетикать коряс XVI-це миронь чемпионатса Лондонца 18 кизоса спортсменць Сергей Широбоков сявозе сиянь медальть, а аф ламода тяда инголе сяськсь юниорхнень еткса легкай атлетикать коряс Европань чемпионатса, кона етась Гроссето итальянскяй ошса. Клавдия Афанасьева арась сяськикс од ломаттнень еткса легкай атлетикать коряс Европань чемпионатса Польшаса, а Салават Илькаев – сиянь призеркс од цератнень еткса мировой первенстваса Кенияса.
Владимир Волков, поздравляндамок спортсметтнень, китькстазе: якамань мордовскяй школась кирдсь и работай сяда тов. «Мзярда эвондасть сталмот, минь ашеськ нолда кяденьконь и сяда тов кирнеськ школать ширенц. Тяни минь няйсаськ: миньцонк ашезь кире спортть лангс мялень шарфнихнень лувкссна. И од спортсметтне, конат достойнайста выступандакшнихть мировой и всероссийскяй старттнень эса, - кемокснесазь тянь. Школась ули, сон эряй и кармай эряма, а минь сяда товга карматама кирнема ширенц», - мярьгсь Владимир Волков.
Физическяй культураса и спортса заслуганкса и оцю спортивнай результатонкса Сергей Широбоковонди максф «Мордовия Республикань физическяй культурань Заслуженнай работник» почетнай лемсь. Стане жа
Владимир Волков макссь спортсментти сертификат квартирань получаманкса. Клавдия Афанасьева и Салават Илькаев арасть Мордовия Республикань Оцюнять премиянц лауреатокс.
Республикань вятись арьсесь спортсметтненди сяда товолдонь сатфкст и азозе, што маластонь пингть олимпийскяй резервань спортивнай школань воспитанникнень эвондай возможностьсна кизоньберьф занцемс пря спортса цебярь условияса: кизоть песта тевс сувафтови легкоатлетическяй манежсь. «Эряви сяда товга работамс виень апак ужялек, штоба тага сатомс авторитет мировой аренаса и мрдафтомс спортивнай якамань мордовскяй школати эсь кайги лемонц», - китькстазе Владимир Волков.
Мордовия Республикань Оцюнять Пресс-службац