Еткшиста, 12 сентябрьста, етась Мордовиянь Оцюнять Владимир Волковонь наукань Российскяй Академиять (РАН) Президентонц Александр Сергеевонь мархта рабочай васедемац.
РАН-ть вятиец ульсь республикасонк васенцеда. «Минь саме ваномс тинь передовой, оцю технологиянь велень хозяйствантень. 2013 кизоня шовордафтольхть марс РАН-ць и велень хозяйствань наукань Российскяй академиясь, минь пяк ладятама агрийхнень мархта. И, конешна, мяленьке сяда маласта содафтомс опытонтень мархта, штоба меле сон ноляволь тевс лия региоттнень эсовок!»
Корхтамась мольфтевсь образованияса и велень хозяйстваса марстонь проекттнень эряфс етафтомаснон колга. Александр Сергеев азондсь «Агрокуб»проектть колга, конань етафнесы эряфс РАН-ць марса РФ-нь Просвящениянь министерствать мархта «Успех каждого ребенка» федеральнай проектть мяльса кирдезь. Конкурснай отборда меле школатне козякофневихть «Агрокуб» лабараторияса, коса ладяф тяниень пингонь оборудования и мебель микробиологиянди, биотехнологиянди, селекциянди и генетиканди. «Тоса ули сембось сянкса, штоба оцю классонь тонафнихне шарьхкотькшнелезь тяниень пингонь велень хозяйствань технологиятнень. Штоба содалезь, што тяниень пингонь велень хозяйствась – тя мялень салай и оцю технологиянь сфера, конань мельге – сай пингсь!» - мярьгсь РАН-нь академиксь и азсь мяль Мордовиянь школатненди примамс участия конкурсса. «Наукань Российскяй Академиясь тяниень пингть башка оцю мяль шарфни средняй образованиянь системати, вдь школаса путневи ся ушеткссь, кона лихнесыне сай пингонь школьникнень оцю наукав» - мярьгсь Александр Сергеев.
Владимир Волков азозе, што республикать ули мялец ладямс сотрудничендамань кеме соткст РАН-ть мархта, сяс мес Мордовиясь аф васенце кизось ни работай «Школа-ВУЗ-Технопарк» цепочкать ладяманц коряс, мольфтемок марстонь тефт инновационнай производствати кадрань анокламать коряс. Азфоль, што тянкса республикаса ули сембось. Сяс мес инь оцю сатфкст, тяконь лувксса международнай уровеньца, сатнихть Асу шабанди Республиканскяй лицеень тонафнихне, региононь руководствась путни задача касфтомс лувксснон образовательнай учреждениятнень, конат лихнесазь шабатнень маштомошиснон. Владимир Волков азсь мяль касфтомс Мордовиянь школатнень лувксснон, конатнень ули РАН-нь базовай школань статуссна. «Можна ваномс тянкса «Тавла» образовательнай центрать, а стане жа кой-кона велень школатнень, конатнень видеса ули кода тонафнемс тяниень пингонь велень хозяйствань программатнень и технологиятнень», - мярьгсь Мордовиянь Оцюнясь.
Васедемать пингста сафоль мяльс кемокстамс сотрудничендамать колга Соглашения Мордовия Республикать и наукань Российскяй Академиять еткса, а стане жа анокламс марстонь работать коряс «дорожнай карта». Тяда башка, ули ванф республикать территорияса РАН-нь представительствать панжеманц коряс кизефкссь. Тя лезды сяда курокста решандакшнемс марстонь проекттнень эряфс етафтомаснон коряс кизефкснень.
Васедемаса примасть участия МР-нь Правительствать Председателенц васенце заместителец – велень хозяйствань и продовольствиянь министрсь Владимир Сидоров и Нижегородскяй областень Законодательнай Собраниянь депутатсь Николай Шкилев.