16 августста Мордовиянь Оцюнять аф оцю пингс тевонзон тиендисна Владимир Волков васетькшнесь Россиянь Правительствать Председателенц Дмитрий Медведевонь мархта. Корхтафоль республикать социално-экономическяй касондоманц-вииякшнеманц колга.
Корхтамась ушедсь социальнай ширеть мархта сотф кизефкснень эзда. Владимир Волков пачфтезе Дмитрий Медведевонди, што республикась пяшкотькшнесы дошкольнай образовательнай учреждениятнень эса васттнень панчсемаснон коряс программать. Вете кизоста Мордовияса ремонтировандасть и строясть 54 идень сад, тяниень пингть республикаса пцтай педа-пес решандаф 3кизоста сявомок 7 кизотненди молемс шабатнень вастса обеспечендамаснон мархта сотф прябалась. И хуш федеральнай программась шумордавсь, Владимир Волков китькстазе, што республикась сяда товга кармай стройсема идень сатт и панчсема дополнительнай вастт, штоба колма кизонь топодемска сембе шабатненди улель кода якамс дошкольнай учрежденияв. Аньцек тядде республикаса тевс сувафтовихть 6 од идень сатт.
Стане жа Владимир Волков азозе, што аделавсь «Юбилейный» эрямань комплексса 1450 вастонди од школать строямац, конац надияфни арамс тяниень пингонь эталоннай школакс. 2020 кизоть самс, кода отмечазе Мордовиянь лидерсь, республикань сембе школьникне кармайхть тонафнема васенце сменаса, стане жа республиканскяй программать эса мяльса кирдеви од школань строямась и уликснень реконструкциясна. Кепотьксонди, аделавома лангса Рузаевкаса школать строямац. Тя кизефксне кирдевихть республиканскяй власттнень башка контрольснон ала.
«Миньцонк аф лама школада, конат работайхть кафта сменаса. Главнай прябалась – тя школатне, конат строяфт кунара ни и эсост эряви тиемс ремонт. Тянь мяльс сявондезь и аноклаф програмась», - азозе Владимир Волков.
«Тя правильна. Мзярда мекольцеда етафнеме мархтонт совещания, мон специальна шарфтонь мяль: омбоце сменась аф фалу оцю прябала. Кда школась цебярь и сембось грамотнайста тиф, то сяда пара тонафнемс омбоце сменаса тяниень пингонь благоустроеннай школаса, коса цебярь педагогическяй коллективсь. Сяс школатнень капитальнай ремонцнон коряс
задачась аф сяда емла од школатнень панчсемаснон коряс», - отмечазе Дмитрий Медведев.
Премьер-министрсь китькстазе, што средстватне тя программас коре региоттнень ширеснон кирнеманкса маластонь колма кизотненди сувафтфт ни.
Стане жа васедемать пингста корхтафоль республикаса экономическяй тефнень колга. 2017 кизонь сисем кофнень итогсна макссихть надияма: промышленнай производствань индекссь пачкодсь 113 процентс, основной капиталти инвестициятне – 118 процент. 2,5-крда кассь республиканскяй продукциять экспортоц.
«Строятама ниле од завотт, конат кармайхть нолнема тяниень пингонь продукция, конань нинге ашезь нолне тяда инголе Россияса», - отмечазе Владимир Волков. Корхтамась моли кабельнай и светотехническяй продукциять колга, а стане жа медицинскяй препараттнень, тяконь лувксса мекольце поколениянь отечественнай антибиотикнень производствасна. Мордовиянь лидерсь отмечазе тя проектть эсь лацонь шинц отечественнай фармацевтическяй промышленностти: «Проектсь решандакшнесыне импортонь полафнемань задачатнень»,- Мярьгсь Владимир Волков.
«Тя пяк цебярь, - согласиндась Дмитрий Медведев. – Сяс мес лезни решандамс минь васенце задачаньконь – лекарственнай безопасностть обеспечендаманц, кинь эздовок аф ащемать. Фкя и сяка лекарстватне, конат нолневихть фкя и сяка химическяй формулас коре, миньцонк, шарьхкотьф, кармайхть сяда уцест, аньцек сянкса, мес аш импортть мархта сотф карьхцьт».
Од лекарственнай препараттнень анокламанкса республикаса «Биохимик» заводть и Мордовскяй госуниверситетонь лабораториятнень видеса панчф «Антибиотики» научно-производственнай и инжиниринговай центра, кизоть аделавомс предприятиясь кярьмоди ниле видонь субстанциятнень промышленнай производстваснонды.
Владимир Волков отмечазе, што нилецьке од завоттне ушедыхть работама сай кизоть кучкаста.
Мордовиянь лидерсь пачфтсь аграрнай отрасляса сатфкснень колга. Касонды велень хозяйствань сембе продукциятнень производствасна, кепотьксонди, сивольть производствац сисем ковста кассь 8 процентта мелянь кизоть коряс. И целайнек велень хозяйствань кизось аделсеви лац. Аграрийхне
арьсекшнихть кочкамс 1,5 миллион тонна сера, средняй урожайностсь – 35 центнер гектарста. Сяда тов полаткшневи оцю инвестиционнай проекттнень эряфс етафнемасна, конат обеспечендасазь республикаса велень хозяйствань производствать сяда товолдонь касоманц.
Башка мяль шарфтфоль 2018 кизонь футболть коряс Миронь чемпионатти анокламати. Владимир Волков пачфтезе, што работась мольфтеви графикс коре, азондсь Саранскяйса спортивнай объекттнень строямаснон колга, инь васенцесь конатнень еткста «Мордовия-Арена» стадионць. А стане жа сянь колга, што стадионть ваксса строяви тяниень пингонь оцю эрямань комплекс, коса кудта башка улихть оцю школа, кафта идень сатт, поликлиника, мишендемань центрат, ваймосеманкса и спортса прянь занцеманкса площадкат. «Минь инь васенце задачаньке, штоба чемпионатть наследияц – од китне, гостиницатне, эрямань куттне, набережнайхне, реконструировандаф аэропортовай комплекссь – сембось тя служаль Мордовиянь эряйхненди лама киза», - китькстазе республикань Оцюнять аф оцю пингс тевонзон тиендисна.
«Молодецтада», - шназе республикать работанц Дмитрий Медведев.
Россиянь Правительствать Председателец кирдезе Мордовияти эрявикс несколька проектть ширеснон. Кепотьксонди, Дмитрий Медведев кемокстазе Минэкономразвитиять решениянц Рузаевкати инголи моли социально-экономическяй развитиянь территориянь статусть максоманц коряс. Од статуссь лезды касфтомс ошть лангс инвесторхнень мялень шарфнемаснон, а лисенди, лезды виияфтомс марнек Рузаевскяй районть.
Стане жа Владимир Волков эняльдсь Дмитрий Медведевонди кирдемс республиканскяй онкологическяй диспансерть строяманц ширенц. Объектть строямац ушетф ни республиканскяй бюджетонь средстватнень вельде, тяни, премьер-министрть поручениянц коряс, поликлинникать должетт сувафтомс федеральнай целевой программати.
Мордовия Республикань Оцюнять Пресс-службац