Саранскяйста тумдонза инголе Хисако Такамадо ульсь святой праведнай воинть Феодор Ушаковонь Кафедральнай соборсонза.
Япониянь Принцессать, кода профессиональнай искусствоведонь, кона лац шарьхкоди живописть и архитектурать эса, пяк мялецоль эсь сельмосонза няемс Поволжьянь фкя инь мазы храмть.
Сонь Иператорскяй Высочествац ванондозе позолоченнай шуфтста иконостасть, алтарнай пяльксонза конань святиндафт святой Федор Ушаковонь, святой Серафим Саровскяень и мокшэрзянь святой мученикнень лемс.
Храмть ваномда меле журналисттнень мархта корхнемста японскяй Принцессась китькстазе:
- 2018 кизось официальнайста азф Японияса Россиянь кизокс и Россияса Япониянь кизокс. И монь пяк пара мялезон, што странантень мархта содафтомазе ушедсь именна Саранскяйса, кона арась футболть коряс Миронь чемпионатонь ошекс-организаторкс. Васендакиге, мон сань тяза, штоба кирдемс эсь команданьконь ширенц, вдь мон Японскяй футбольнай ассоциациять покравительницац. Кеняртьфти, што минь спортсменоньке достойнайста налхкозь васенце отборочнай матчть, сяськомок сатомшка вии соперникть – Колумбиянь сборнайть. Тяда башка, колумбиецненди ламода лездсть синь болельщиксна, конатнень эзда пяк ламоль «Мордовия Арена» стадионть трибунанзон лангса. Япониянь болельщикта лувксс коре сяда кржаль, но надиян, минь команданьконь ширенц кирдезь россиянь эряйхне. И кода иток, минь няфтеме цебярь налхкома и сяськоме. Надиян, цебярь ушеткссь лезды футболистоньконди чемпионатонь лия матчнень пингстовок.
Госпожась Такамадо шназе и ся ялгаксшить, кона азорондась Саранскяйса матчень шиня: «Оцю налхкомась – маласькофнесыне разнай странань нароттнень, лезни сяда лац шарьхкотькшнемс фкя-фкянь».
Корхтамок Мордовиять колга, Сонь Императорскяй Высочествац виденцясь, што содась лама одня республиканьконь колга, коса тяниень пингть ладязь эряйхть сядода лама этносень представительхне. Кеподезе мяленц ся, што регионца кородезь ванфневихть национальнай культурась и искусствась.
«Монь дивандафтомань, мзяра асу ломань шачсь и кассь тинь масторонтень лангса! Мялезе, штоба монь земляконевок сяда маласта содальхть культурантень колга, а Россиянь эряйхне содальхть Япониянь искусствать колга», - мярьгсь Хисако Такамадо.
«Известия Мордовии»