Регионть и лична Артём Здуновонь работаснонды Анна Цивилеса макссь оцю оценка. «Мзярда лиссь государственнай фондть пуроптоманц колга Россиянь Президентть Указоц, Артём Алексеевич ульсь губернаторхнень лувксса, конат састь ширезонк васенцекс, - азозе сон. - Минь мархтонза эстокиге корхтафтоськ, мезе кармай тиендема фондсь, муме шарьхкодема тя кизефксса. И тячи фондса няйфсь тянь кемокстазе. Тиньцонт пяк лац кочкаф зданиясь, работай «фкя вальмянь» службась, пуроптф социальнай координаторонь штат. Пяк пара, мес синць СВО-нь ветераттне арсихть фондонь сотрудникокс, социальнай координаторкс. Синь азондозь тейне, што региональнай власттнень лезкссна макссеви эстокиге. И ширень кирдемать синь фалу марьсесазь. Сяс мялезе спасибамс сембе командати, тяконь лувксса республикань руководствать тя тевти внимательнайста и ответственностень марязь малаткшнеманкса. Пара мялезон, што аф юксневихть семьятне, конат юмафтозь цёраснон — лангозост стане жа шарфневи оцю мяль».
Анна Цивилева шназе мрдаф боецнень диспасеризацияснон коряс программать, кона нолдаф тевс республикасонк. «Тя цебярь опыт. Ламоц цёратне, ётамок военнай действиятнень пачк, получсихть кяшф травмат, конат пингонь ётазь кадондыхть пильгокит шумбрашиснон лангс. Тя и стрессовай растройстват, и сахарнай диабет, и лия урматне. Диспансеризацияда меле ули примаф решения, коза прважамс ломантть — пчксема или реабилитацияс, шять, теенза эряви специалистонь специализированнай лезкс. Тя важна. Тейнек эрявихть шумбра ломатть. Мяленьке, штоба синь эряльхть ламос. И тяни минь вяттяма корхтама РФ-нь здравоохранениянь министрть мархта сянь колга, штоба Мордовиять опытоц улель келептьф марнек странать эзга», - мярьгсь сон.
Артём Здунов стане жа шарфтсь мяль, што диспасеризациясь лезды инголдамс ламоц зияттнень. «Сяс мес сидеста урматне, конатнень лангс сонць ломанць афоль шарфта мяль, ётнихть хроническяй формас. Сядонга пяк эрявикс диспансеризациясь, кда ломанць ранендафоль, кда улихть стакат-сталмот ампутациять мархта, протест эрявихть путомс. Вдь ломанти эряви работамс. Сяс лувондса, што диспасеризациясь пяк эрявикс тев. Минь сяда товга карматама ётафнемонза сонь», - мярьгсь республикань руководительсь.
СВО-нь ветераттнень мархта корхнемста Анна Цивилева мярьгсь: «Спасиба теенть смелшинкса, героизманкса. Минь карматама тиендема семботь, мезсь вийсонк, штоба няфтемс заботендаманьконь и ширень кирдеманьконь. Няйсаськ, кода тя ситуациясь пуропнесы марс обществать, тиендьсы сонь сяда цебярькс, эреклафнесыне нравственнай и семейнай питнишитнень. Тяниень пингть сембе старандайхть кирдемс марса и шарьхкотькшнесазь, што афкукс питни тя эряфса: семьясь, кельгомась, ширень кирдемась, заботендамась. Арьсян теенть и семьянтенди шумбраши и цебярь эряф».
Мордовия Республикань Оцюнять пресс-службац