Республикань Кудосонть чадыковонь 9-це чистэ ютавтовсь Мордовия Республикава федеральной прявт инспекторонь яволявтомась. Те - Михаил Викторович Трофимов.
Церемониянть видеоконференцсвязенть вельде ютавтызе Равчирень федеральной округсо Россиянь Федерациянь Президентэнь Полномочной представителесь Игорь Комаров, тосо ульнесть Мордовиянь Прявтось Артём Здунов, Мордовия Республикань Прявтонь ды Мордовия Республикань Правительствань Администрациянь, федеральной структуратнень территориальной органтнэнь, правань ванстомань блоконь, региононь властень органтнэнь руководительтне.
«Михаил Викторовичень ули Ванстомань федеральной службасо важодемань 30 иень опытэзэ, ютась ки инженерстэ саезь Россиянь ФСО-нь территориальной куншкакуронь прявтонть видьс. 2022 иестэ покш невтевкстнэнь кисэ ФСО-нь Мордовиянь куншкакурось ёвтазь сехте вадрякс Россиясо. Теньсэ путовксозо Михаил Викторовичень. Сон чачсь республикасонть ды пек парсте содасы регионсонть молиця тевтнень. Кеман, содамочитне, опытэсь ды профессионализмась лездыть шкастонзо ды вадрясто топавтомс путозь тевтнень», - мерсь Игорь Комаров.
Башка мель полпредэсь явсь республикасонть сыця кочкамонь кампаниянтень. Тедеде Госдумань депутаттнэнь кочкамост марто вейсэ ютавтовить региононь прявтонь, Госсобраниянь депутаттнэнь, Саранскоень представительной органтнэнь ды муниципальной округтнень кочкамотне. ГФИ-нть тевезэ - топавтомс федеральной органтнэнь координациянть, эрицятнень праваст ванстоманть ды гражданской обществань институттнэнь марто вейсэнь тевдеемань электоральной цикланть перть общественной сэтьмечинть ды правопорядоконть кирдеманть туртов.
Полпредэсь тешкстынзе ГФИ-нь важодемань прявт ёнкстнэнь региононь власттнень марто вейсэ: государствань оборонань заказонь топавтомась, военнослужащейтненень ды сынст семиятненень лездамось, экономикань свалшкань лувонь ванстомась. «Эряви поладомс явомо мель демографиянтень ды шумбрачинь ванстомантень. Региононь руководстванть ушодксонзо коряс кемекстазь эйкакш марто семиятненень лездамонь 40 ламо тевть. Республикасонть топавтови варчамонь проект чачтоманть кастомга ды репродуктивной шумбрачинть вадрялгавтомга», – тешкстызе Игорь Комаров.
«Од аравтомась – республикань властень органтнэнь структурасонть прявт полавтома. Прявт федеральной инспекторонь должностесь саи прявт тарка Равчирень федеральной округсо Россиянь Федерациянь Президентэнь полномочной представителень аппаратонть, правань ванстомань блоконть ды территориальной органтнэнь марто вейсэнь важодемасонть – вейсэ минь топавтано ваннома минек Президентэнть кармавтоманзо топавтоманть мельга, - тешкстызе республикань Прявтось. - Михаил Викторовичень минь весе парсте содасынек - сон свал эрясь ды важодсь тиринь республиканть лезэс. Содасы региононть ды ломантнень, тень мельсэ кирдезь миненек мереви топавтомс путозь тевтнень. Минь Мордовиясо тонадынек важодеме командасо. Михаил Викторович - минек республикань командас совиця. Ды весе вейсэ минь соватано минек Президентэнь командантень».
Артём Здунов тешкстынзе сыця важодемасонть прявт тевтнень. Те специальной военной операциянь тевтнень топавтомась, военнослужащейтнень семиятненень лездамось. Маласо шкантень прявт тевесь – 2026 иень общественно-политической прявт тевенть ютавтомсто сэтьмечинь, законностень ды легитимностень топавтомась.
Михаил Трофимов ёвтась сюкпря максозь кемеманть ды Россиянтень ды тиринь республикантень служамонь возможностенть кисэ ответственной од таркасонть.
«Мордовиянь эрьва эрицясь марязо государстванть пельде мелень явома ды неезэ властенть ды обществанть вейсэнь важодемань алкуксонь цетавкстнэнь. Мон анокан важодемс панжадо, видестэ ды ответственнойстэ. Кунсоломс ды марямс эрьванть, кинь ули мелезэ кемекстамс Россиянь мельтнень-ванновтнень ды виевгавтомс Мордовиянть. Важодеме карматано кеме сюлмосо ды нежедеме Мордовиянь правань ванстомань блоксто, федеральной структуратнестэ ды госвластень органтнэстэ коллегатнень профессиональной опытэст лангс. Вейсэ минь тейсынек весементь, республикась кармазо Россиянь экономикань коряс седеяк виев, сэтьме, неень шкань ды вадря регионокс», - мерсь сон.
Мордовия Республикань Прявтонь Пресс-службась