Артём Здунов тешкстызе: течи эряви саемс мельс од тандавкстнэнь, сынст ютксо пилоттомо коштонь суднатнэнь тевс нолдамось. «Тень кувалма эряви топавтомс башка тевть, конат аравтозь объекттнэнь сэтьмечист топавтомантень», – мерсь Артём Здунов.
Промкссонть ваннозь панжиковонь кенярксчитнень шкасто массовой мероприятиятнень сэтьмечинь кевкстематне. Террористической тандавкстнэнь а нолдамонтень исполнительной властень федеральной органтнэнь территориальной органтнэнь вийтнень ды средстватнень анокчидест пачтясть МР-ва МВД-нь ды МР-ва Росгвардиянь Управлениянь представительтне. Кода тешкстызе МР-ва МВД-нь полициянь прявтонь полавтыцясь Владислав Пинаев, чадыковонь 29-це чистэнть саезь панжиковонь 12-це чинть самс внутренней тевень органтнэнь весе личной составось ютавтови службань кандомань виевгавтозь лувонтень. Массовой мероприятиятнень ютавтомань весе таркатнесэ кармить важодеме реагированиянь специальной службат.
Промкссонть истя жо ваннозь межнациональной ды межрелигиозной отношениятнень, профилактикань важодемань кевкстематне сеть лицятнень марто, конат понгить терроризмань идеологиянь ды неонацизмань мельтнень-ванновтнень тевдееманть алов.
«Эряви покш ответственность марто кундамс общей, адресной ды башка профилактикань кевкстематненень. Культурань, раськень политикань ды архивень тевень министерствантень кода терроризмань идеологиятнень комплексной аравтлувонь прявт топавтыцянтень эряви саемс башка ванновт алов важодиця мигранттнэнь марто мероприятиятнень ютавтоманть. Религиозной общественной организациятне, раськень диаспоратнень лидертнэ, важодемань таркатнень максыцятне иляст аште ве ено – ней истямо шкась», – тешкстызе Артём Здунов.
Теде башка, Мордовия Республикасо Антитеррористической комиссиянь ды Оперативной штабонь вейсэнь промксонтень пурнавозетне кортасть промышленностень, уштомань-энергетической комплексэнь, транспортонь инфраструктурань, образованиянь, шумбрачинь ванстомань объекттнэнь ды ламо ломанень пурнавома таркатнень антитеррористической ванстомань уровнянь кепетемань коряс башка тевтнеде.
Мордовия Республикань Прявтонь пресс-службась