«Национальной проектэнь топавтоманть шкасто саезь РФ-со панжозь инвалидтнэнь ды сыре ломантнень туртов 38 неень шкань стационарной учрежденият. Тень вельде истямо стационаронь лувсо лезкс явозь 3875 ломантнень туртов. Сынст строямс федеральной бюджетстэ явозь 10 млрд ламо целковойть», – евтнесь РФ-нь Трудонь ды социальной ванстомань министрась Антон Котяков, тешкстызе, 5 объекттнэ строязь Мордовиясо.
Кортамось моли, васняяк, сыре ломантнень ды инвалидтнэнь туртов неень шкань кудотнень-интернаттнэнь строямодост, косо условиятне малавикст кудонсетненень. Нацпроектэнь коряс уш максозь объекттнэсэ ды строявиця зданиятнесэ теезь условият сыре ломантнень вадря эрямост туртов.
«Неень шкань архитектурань, инженерэнь решениятне лездыть сыре ломантненень седе куватьс якамс эсест мельга, ванстомс физической, шкинемань ерокчинть аволь стака тевдееманть ды оймсемань туртов», – тешкстызе министрась.
«Меельце кавто иетнестэ Мордовиясо минь путынек инфраструктурантень 2,2 млрд целковойть социальной виевгавтомань коряс федеральной программанть лувсо. Ковылкинасо теезь пек вадря учреждения, косо кемекстави вейкеть мельтнень-ванновтнень коряс сыре ломантнень вейсэндявксось. Тесэ пенсионертнэнь туртов теезь вадря условият эрямонть туртов, сынь тесэ стыть, ловныть, морыть, ютыть занятият инструктортнэнь марто, учреждениясь топавты чить улемань коряс программа. Сюкпря республикантень лездамонть кисэ тыненк, Антон Олегович, ды весе тынк командантень», – мерсь Мордовиянь Прявтось Артём Здунов.
2023 иестэ «Демография» нацпроектэнть лувсо арсеви панжомс стационарной социальной обслуживаниянь 20 объектт, конатнес кельгстявить 2260 эрицят.