Сундерьковонь 20-це чистэ Мордовия Республикань Прявтонь тевтнень нурька шкас топавтыцясь Артем Здунов Саранскойсэ якась «Мира» куншкакуронтень, косо кортась тонавтыцятнень марто ды казинзе «Большая перемена» школасо тонавтницятнень туртов Весероссиянь пелькстамосонть изницятнень Агнесса Куприяновань ды Татьяна Баковань.
Ледстясынек, «Мира» ёроков эйкакштнень редямонь ды сыненст лездамонь региононь куншкакурось панжозь 2019 иестэнть «Образование» нацпроектэнть лувсо, конань яволявтызе Россиянь Президентэсь Владимир Путин. Куншкакурось важоди колмо ёнксонь коряс: «Искусство», «Наука» ды «Спорт», прявт тевезэ – содавтомс ёроков эйкакштнень проектэнь ды исследованиянь тевдееманть марто.
Мордовия Республикань Прявтонь тевтнень нурька шкас топавтыцясь Артем Здунов покш мель марто ваннынзе Куншкакуронь весе площадкатнень, а тесэ эйстэст пек ламо: те искусственной интеллектэнь ды инженерэнь системань, агробиотехнологиянь, цифровой производствань ды дизайнонь, физической исследованиятнень ды астрономиянь лабораторият, литературань ды театрань шкинемань, раськень культуратнень студият. Ули шахматань зона, эрямонь шумбра лувонь лаборатория, тренажеронь панжадо площадка, спортзал, стадион ды мик планетарий. Мордовиянь руководителесь кортась Куншкакуронь тонавтыцятнень марто, кевкстнинзе эйкакштнень марто важодемадонть.
Теде мейле ютавтовсь «Большая перемена» школасо тонавтницятнень туртов Весероссиянь пелькстамосонть изницятнень 12№ гимназиянь 11-це классонь тонавтницянть Агнесса Куприяновань ды 35№ школань 10-це классонь тонавтницянть Татьяна Баковань марто вастовомась. Ледстясынек, пелькстамось ютавтозь Россиянь Президентэнть Владимир Путинэнь мелензэ коряс, сонзэ смустезэ – максомс возможность эрьва эйкакшонтень невтемс эсь прянзо ды муемс виев ёнксонзо.
«Мон варштынь – Мордовиясь кучсь пелькстамонтень 4,5 тёжат эйкакшт – те пек ламо. 42 полуфиналистт, 5 финалистт – те покш изнявкс! – мерсь Артем Здунов. – Арсян, республикасонть миненек эряви седе покш мель явомс од ломантненень. Эрявить теемс весе условиятнень сынст туртов: те важодема таркат, ёрокчист кастомаст туртов истят куншкакурот».
Мордовиянь руководителесь тешкстызе, сон чарькодьсы, кодамо стакакс пелькстыцятнень туртов ульнесь изнямонтень кись, зяро аволь шожда тевть сыненст савсь топавтомс.
«Монень покш мельспаро теевемс мартонк содавиксэкс!» - мерсь Артем Здунов изницятнень каземстэ. Агнесса Куприянованень ды Татьяна Бакованень максозь благодарственной сёрмат ды 10 тёжат целковойс сертификатт. Благодарственной сёрмасо истя жо тешкстазь сынст тонавтыцяст ды тетяст-аваст.
Мордовия Республикань Прявтонь тевтнень нурька шкас топавтыцясь истя жо ваннызе тонавтнемань учреждениянть перька тарканть, сонензэ невтизь теплицатнень, конатне путозь неень шкань агротехнологиятнень тонавтнемаст туртов.
Мордовия Республикань Прявтонть пресс-службась