Сундерьковонь 20-це чистэ Мордовия Республикань Прявтонь тевтнень нурька шкас топавтыцясь Артем Здунов ютавтсь важодемань промкс нацпроекттнэнь топавтомаст коряс. Региононь руководителесь яволявтсь, неть тевтнес явозь ярмактнень мельга ваномась карми пек пшти, нацпроекттнэнь топавтомань прявт ёнксось – важодемань од таркатнень теемась. Тень коряс карми максовомо питне министратнень важодемантень.
Правительствань члентнэнь марто промксось ютавтовсь видеоконференциянь лувсо. Министратне пачтясть нацпроекттнэнь топавтомадост.
Мордовия Республикань Прявтонь тевтнень нурька шкас топавтыцясь тешкстызе, пандемиянть шкасто самай нацпроекттнэ аштить экономикань кастомань-кепетемань прявт ёнксокс, сынст вельде теевить важодемань од таркат – республикасонть аволь сехте вадрят тевтне эрицятнень занятостенть марто, те кевкстеманть региононь министратненень эряви саемс башка ванновт алов.
«Эрьва министрантень эряви чарькодемс: нацпроекттнэнь топавтомсто свал эряви теемс важодемань таркат. Занятостенть коряс кевкстемась республикасонть ашти пек пштистэ, секскак министерстватнесэ эряви анокстамс аравтлув важодемань таркатнень теемаст коряс. Башка нежедькс теемс экономикань блоконть, велень хозяйствань ды промышленностень министерстватнень лангс. Бути мезеяк строятанок – теевест важодемань од таркат», - мерсь Артем Здунов.
Теде башка, Мордовия Республикань Прявтонь тевтнень нурька шкас топавтыцясь башка мель явсь сеть объекттнэнень, конатнень коряс моли кадовома строямонь графиктнень эйстэ, яволявтсь, карми ветявомо пшти ванома весе невтевкстнэнь шкасто топавтомаст мельга. «Нацпроекттнэнь вельде вадрялгавтови эрьва ломаненть эрямозо, - мерсь Мордовиянь руководителесь. – А эряви стувтнемс, минь важодтянок республикань эрицятнень лезэс. Секскак карматанок ваномо неть тевтнес явозь ярмактнень ютавтомаст мельга. Ярмактне, конатнень яви федеральной бюджетэсь, важодест регионсонть эрямонь вадрялгавтоманть лангс».
Кода тешкстызе республикань руководителесь, нацпроекттнэнь топавтомань лувсо объекттнэнь строямонть графикенть эряви ванномс эрьва недля, а нолдамс кадовоманть.
Мордовия Республикань Прявтонть пресс-службась