Сундерьковонь 19-це чистэ, республикасо важодемань васенце чистэнть, Мордовия Республикань Прявтонь тевтнень нурька шкас топавтыцясь Артем Здунов ютавтсь республикасонть коронавирусонь инфекциянть профилактикань ды седе тов а нолдамонь коряс оперативной штабонь промкс. Кортамось мольсь кевкстематнеде, конат сюлмавозь регионсонь эпидемиологиянь тевтнень марто. Промкссонть ульнесть Мордовиянь Правительствань Председателесь Владимир Сушков, вице-премьертнэ Галина Лотванова ды Александр Седов, Правительствань члентнэ.
«Течи кунсолосынь специалисттнэнь ванновтост сень коряс, кода алкукс молить тевтне, - мерсь Артем Здунов. – Ушодтанок Роспотребнадзоронь статистикастонть, кунсолосынек Минздравонть – кода коронавирусонть марто вейсэндявить респираторной лия орматне. Кортатанок больницятнесэ таркатнеде – зяро теезь, зяро эштё улить анокстазь. Ёвтынк весе меленк-арсеманк, весементь эряви кортамс важодемань лувсо. Лекарстватнень улемадост, кода максовить рецепттнэ, улить-арасть анокставкст. Ды, нама, кода ютавтовить сеть ярмактне, конатне миненек явовить, кода сынь пачтявить ломантненень».
Мордовия Республикань Прявтонть пресс-службась