Таштамковонь 16-це чистэ Мордовия Республикань Прявтонь тевтнень топавтыцясь Артём Здунов ютавтсь вастовома «Молодые профессионалы» (Ворлдскиллс Россия) Национальной IХ чемпионатонь финалсонть студенттнэнь-изницятнень марто. Кортасть Уфасо финалонть ютавтомадонзо.
Региононь руководителесь тешкстызе, «Молодые профессионалы» раськеютконь движениясь - важодемань профессиятнень одкстомтомань прявт инструменттнэстэ вейкесь. "Уш ней масторсонть пурназь од ломантнень покш армиясь, конатне вадрясто содасызь эсь тевест. Евтан тенк поздоровт изнямонть кувалма. Нурька шканть перть федеральной рейтингсэнть минь кепедевинек 30 тешксэс - ней сайтяно 37 тарка. Те корты ламодо. Средней профессиональной образованиянтень минь явтано покш мель ды нейтяно, касомань резерватне эште улить. 2 иетнень перть минь тейтяно эште 41 мастерской. 2022 иесь Мордовиясо ютавтови важодемань профессиятнень кастомань-кепетемань тешксэнть ало", - мерсь Артём Здунов.
Мордовиянь Прявтонь тевтнень топавтыцясь истя жо ледстизе, «Молодые профессионалы» (Ворлдскиллс Россия) Национальной Х чемпионатонь финалось ютавтови Саранскойсэ. "Евтынк меленк, кода весе ютась Уфасо. Косо эриде, мейсэ эйсэнк андсть, косо ютасть пелькстамотне? Тынк опытэсь лезды тенек ютавтомс юбилеень финалонть пек парсте", - мерсь региононь руководителесь.
Константин Гончаров, «Разработка мобильных приложений" компетенциясонть изницясь евтнесь, Уфась инжетнень вастынзе парсте. Участниктне эрясть студентэнь общежитиятнесэ, финалонь пелькстамотне ютавтовсть СПО-нь тонавтнемань заведениятнень юрсо. Стакачитне ульнесть Саранскойсэ анокстамсто, аволь весе таркатнесэ улить эрявикс программа марто виев компьютерт.
Артём Здунов кармавтсь Мордовиянь Информатизациянь ды связень министрань тевтнень топавтыцянтень Игорь Вольфсоннэнь саемс ванновт алов пелькстамонтень IT-специалисттнэнь анокстамонть. Теде башка, МР-нь Прявтонь тевтнень топавтыцясь мерсь, сы иень финалонтень анокстамонть эряви ушодомс маласо шкастонть.
Чемпионатонь изницятненень ды сынст тренертнэнень явшезь Мордовия Республикань Прявтонь благодарностть.
Мордовия Республикань Прявтонь пресс-службась