«Цифровизация АПК» классонть, конась теезь «Приоритет-2030» университетэнь виевгавтомань программанть лувсо, Артём Здуновнень невтизь велень хозяйствань ракшатнень учетонь ды регистрациянь автоматизированной системанть, истя жо зярыя лия специализированной программатнень.
«Квест для школьников» профориентациянь колмо площадкатнесэ ютавтовсть мастер-класст: ракшатнень УЗИ-обследованиянть, истя жо сити-фермерстванть ды якстерькаямонь пидемс эмежтнень кастомань технологиянть коряс. Квестэнь участниктнень марто кортамсто Мордовиянь Прявтось кевкстинзе школасо тонавтницятнень профориентациянть коряс, вузонь ды профилень министерствань представительтнень – кодат преимуществат максовить агроклассонь прядыцятненень, бути сынь бажить молемс тонавтнеме аграрной факультетс. Грумингенть – кискатнень нарамонь коряс мастер-классонь участницанть марто Артём Здунов кортась те специальностенть Важодемань профессиятнень чемпионатонь пелькстамонь программантень совавтомадонзо.
Форумонть лувсо истя жо ютавтовсь вакансиятнень ярмункась - «Трудоустройство выпускников» деловой налксемась, конасонть аграрной специальностнень прядыцятне ютасть собеседования сы шкань важодемань таркатнень максыцятнень марто. Зярыятнень марто кортась республикань Прявтось. «Ветеринария» специальностень 5-це курсонь студенткась Маргарита Зарецкая евтнесь, тедеде «ветес» пряды тонавтнеманзо ды арси молемс важодеме республикань покш агрохолдингтнестэ вейкентень. «Артём Алексеевич, арсян, минек институтсонть эряви панжомс агрокласс, косо домкасто мереви тонавтнемс касовкстнэнь ды ракшатнень биологиянть, агрохимиянть аволь ансяк студенттнэнень, истя жо школасо тонавтницятненень. Классонтень эрявикс оборудованиянть путомасо лездавольть бу республикань велень хозяйствань предприятиятне», – евтызе мелензэ студенткась.
Эряви тешкатамс, уш ней региононь 58 школатнесэ теезь 59 агрокласст, конатнесэ тонавтнить 570 эйкакшт. Высшей ды средней тонавтнемань учреждениятнес аграрной енксонть коряс тонавтнеме понгоманть туртов предметтнэ тосо тонавтневить седе домкасто, ютавтовить семинарт, мастер-класст, экскурсият ды натой АПК-нь предприятиятнесэ кизэнь стажировкат.
Од ломантне истя жо макссть кевкстемат тонавтнеманть прядомадонзо мейле Мордовиянь велень хозяйствань отраслясонть важодемань таркатнень муемадост ды «Наставничество» проектсэнть улемадонть.
Собеседованиядонть мейле Артём Здунов мерсь: «Прявтось, истят собеседованиятнень ютавтыть сынсь производственниктне, агропромышленной комплексэнь покш предприятиятнень руководительтне. Мон покш мельсэ кортынь од ломантнень марто аволь ансяк важодемань таркатнеде, истя жо кевкстнинь сынст мелест-арсемаст – общежитиясо эрямодонть, общественной нагрузкадонть, мелень явомадост. Важодемань таркатнень муеманть коряс превспутомат, нама, истя жо максынь, эдь содан ламо руководительть – косо седе вадря ютамс практиканть, кона предприятиятнесэ тевс нолдавить од технологиятне, од лувсо ветяви кадрань политикась, косо общественной эрямось «лаки», «социалкась» виев. Лиятне бажить важодемс велень хозяйствань министерствасонть, ветямс общественной тевдееманть, ладямс процессэнть. Тенесэ эряви лездамс од специалисттнэнень!»
Аграрной од ломантнень форумонь итогтнень евтамсто Мордовиянь Прявтось казинзе сонзэ изницятнень ды ероков участниктнень.
Тешкстасынек, Мордовиясо топавтови АПК-со кадрань потенциалонтень лездамонь ды виевгавтомань программа. Сонзэ коряс пандовить выплатат студенттнэнень, конат тонавтнить велень хозяйствань специалтносттнень коряс, аграрной стипендият бюджетстэ ды важодемань таркатнень максыцятнень пельде, региононь АПК-со важодиця од специалисттнэнень подъемнойть ды зарплатантень эрьва ковонь пособият. Неень шкане те программанть участникекс кармасть – 376 од специалистт ды студентт.
Мордовия Республикань Прявтонь пресс-службась