Чинь повесткась анокстазель экономикасо ды промышленностесэ молиця тевтнень мельсэ кирдезь.
«Бизнесэнь ушодкстнэ ней пек эрявить. Арсян, течинь вастовомастонть весе ливтить мезе-бути лезэв сы шкань важодеманть туртов», – мерсь Артём Здунов.
Предпринимательтне кортасть импортонь полавтомадонть, питнень политикадонть, бизнессэ туристэнь енкстнэнь виевгавтомадост ды административной органтнэнь марто вейсэнь важодемань енкстнэде.
Вейке участникесь евтась мель-арсема витнемс стака техниканть, конась ловови а эрявиксэкс (списанной), конатнес а эрявить импортонь комплектующейть. Артём Здунов кирдизе те меленть, тешкстызе, асатыця техникань коряс стакачинть те целанек а витьсы, ансяк истямо эрявиксчи ули. Сон кармавтсь ванномс предприятиянтень башка площадьтнень явомадо кевкстеманть.
Мордовиянь кшинь паницятне кортасть питнень политикадонть ды федеральной сетень микшнемань точкатнень продукциянть кисэ пандомань шкатнеде. Тень кувалма республикань Экономикань, микшнемань ды предпринимательствань министрась Алексей Грибанов евтнесь МСП-нь те сферанть туртов лезксэнь енкстнэде. Региононь Прявтось явсь мель: предпринимательтненень седе эрязасто эряви евтнемс государстванть пельде явовиця лезкстэнть.
Зярыя кевкстемат кепедсть башка бизнесэнь представительтне. Сынь токшить ведомстватнень марто электронной документооборотонь тевс нолдамонть, региононь тонавтнемань учреждениятнесэ гостиницань бизнесэнь сотрудниктнень дистанционной лувсо тонавтомадонть ды зярыя лия кевкстематнеде. Истят программатне седе тов лездавольть вузтнэнень лисемс регионъютконь уровняс.
«Бизнесэсь кортавты эйсэнк, сы шкастонть тынь карматадо важодеме аволь ансяк Мордовиянь отельертнэнь лангс, истя жо лия региононь. Неть ушодкстнэ лездыть келейгавтомс тынк возможносттнень, сынст эряви ванномс-кунсоломс», – пшкадсь Огарев лемсэ МГУ-нь представительтненень региононь руководителесь.
Предпринимателесь Вадим Петряев евтнесь, зярыя иетнень перть сон топавты кемпингтнень ды глэмпингтнень виевгавтомань коряс проект, ней Кочкуровань енкссонть, сы шкасто – Инерка эрькесь. Сон пшкадсь явомс лезкс льготань кредиттнэнь вельде. Тешкстазель, Ростуризманть коряс регионось веши малав 200 млн целковойть а велявтовиця ярмакт, конатнень получамс истя жо пельксты те бизнес-проектэнь яволявтомась.
Истя жо кортасть бизнесэнь субъекттнэнь марто ТКО-нть коряс важодемань договортнэнь тешкстамодост, льготань кредиттнэнь максомадост ды сынст коряс каязь яволявтоматнень ванномань шкань киртямодонть. Истя, кемекстазель решения, пачтямс мель-арсема РФ-нь Минэкономикав кредиттнэнь получамс яволявтомань ды документтнэнь максомань вейкине форманть кемекстамодо.
Меельцекс Мордовиянь Прявтось макссь зярыя кармавтомат, истя жо тешкстызе, бизнес-вейсэндявксонть марто истямо лувонь вастовоматне улить поладозь.
«Сыця вастовомастонть эряви кортамс комплектующейтнеде, рамамонь ды миемань рынкатнеде, госзакупкатнеде, налогонь сферадонть. Покш мель марто кортан мартонк тынк талновтыця кевкстематнеде, ансяк неян, ламотне витевить министерстватнень уровнясонть. Кармавтан коллегатненень седе эрязасто важодемс бизнесэнть марто, ванномс евтазь эрьва меленть», – тешкстызе Артём Здунов.
Мордовия Республикань Прявтонь пресс-службась