Мордовиянь Прявтось Артём Здунов ды Антон Котяков макссть питне строямонь тевтнень молемантень ды вадрячинтень. Инжетненень евтнесть кудонь-интернатонь проектэнть коряс. Социальной объектэнть покшолмазо малав 15,5 тежат кавонзазь метрат, сон тееви 150 ломантнень эрямост туртов. Ней тевтне топавтозь 68%, объектсэнть важодить 80 ламо ломанть: путовить сеттне, вальматне ды кенкштне, топавтовить потмонь важодематне, зданиянтень ветязь газ, башка нупальтне уштовить, рамазь эрявикс оборудования малав 631 млн целковойтнень питнесэ.
Кортасть зданиясонть нупальтнень схеманть коряс, истя жо функциональнойтнень – вейсэнь занятиятнень туртов нупальтнень, мастерскойтнень, спортонь залтнэнь, подсобной ды хозяйственной нупальтнень.
Тундонь-кизэнь самсто подрядной организациясь кунды учреждениянь перька тарканть вадрялгавтомантень-мазылгавтомантень – беседкатнень путомо, спортонь площадкатнень, кизэнь эстрадань тееме. Истя жо арсеви теемс кизэнь теплицат ды озавтомс сад-пире – те меленть башка кирдизе федеральной министрась.
«Строямонь тевтнень покш пельксэсь уш прядозь. Эряви покш мель явомс отделкань тевтненень, оборудованиянь путомантень, нупальтнень пирямонтень. «Демография» нацпроектэнть лувсо истят объекттнэнь строямсто прявт тевесь – теемс эрямонь условиятнень кудонсетненень малавиксэкс ды вадрякс сыре ломантнень туртов. Объектэсь вадря, пштистэ ванодо важодеманть мельга, штобу кенеремс весементь теемс шкастонзо», – мерсь Антон Котяков.
Вастовоманть прядовомга Краснослободской енксонь прявтось Алексей Буйнов тердизе РФ-нь Трудонь ды эрицятнень социальной ванстомань министранть самс те социальной учреждениянть панжомо.
Мордовия Республикань Прявтонь пресс-службась