Ледстясынек, Мордовиясо топавтови тактической медицинань коряс варчамонь проектэсь. Чадыковонь 23-це ды 24-це читнестэ Дмитрий Хубезовонь ветямонзо коряс ютавтовсь 40 инструктортнэнь васенце лезксэнь явомань содамочитнес тонавтомась. Курсось лезды аволь ансяк ванномс уш улиця содамочитнень, истя жо теемс тень СВО-нь ютавтомань таркатнесэ ды паксянь медсанбаттнэсэ боецтнэнень лезксэнь явомань участникенть пшти ванновтонзо ало.
Инжетненень пшкадемстэ, Артём Здунов евтась сюкпря вейсэнь тевдееманть кисэ: «Минек эрицятнень зярыя категориятнень туров истят содамочитне пек питнейть. Миненек эрявить ломанть, конат кармить сынст ламолгавтомо. Мероприятиясь ютась мельстуиця лувсо, тынь ульниде тосо – минек медиктне покш мельспаросот».
Дмитрий Хубезов тешкстынзе футболонь-шожда атлетикань манежень пек вадря условиятнень, тосо ютавтовсть занятиятне. «Эрямось кемексты эсь питнейчитнень, ды васенце лезксэнь явомань темась целанек чарькодевикс ды виде, – тешкстызе сон. – Васенце эскельксэнть мереви ловомс теезекс – 40 ломанть тонавтозь. Миненек эряви самс невтевксэнтень – 100% тевтнень пингстэ, зярдо васенце лезксэнть ломанентень мереви явомс, сон улезэ явозь медицинань лезксэнь куроксто явомань службанть самодонзо икеле. Те истя лемдевицят «платинань» вете минутат, зярдо лездыть ломантне, конат маласот».
РФ-нь Госдумань депутатось тешкстызе, Мордовиясо улить сатышка специалистт, конатнень улить истят содамочист, натой раськеютконь сертификатт марто. Весе сынь седе тов кармить максомо содамочист, истя жо ломантненень, конат важодить организованной коллективтнень марто – тонавтыцят, общественной транспортонь ветницят, микшнемань куншкакуротнень сотрудникть.
«Минь тень тейтяно аволь ансяк перьканок ломантнень, истя жо эсенек туртов. Миненек эряви кемемс: минек идесамизь сеть, кинь минь тонавтынек», – мерсь Дмитрий Хубезов. Сон истя жо тешкстызе, проектэнть топавтомасо Мордовиянтень лезксэсь карми явовомо седе товгак.
Мордовия Республикань Прявтонь пресс-службась