Московсо эйзюрковонь 5-це чистэ ютавтовсь Мордовиянь Прявтонть Артём Здуновонь ды Россиянь строительствань ды ЖКХ-нь министранть Ирек Файзуллинэнь важодемань вастовомась. Вастовомань прявт кевкстемась - цётавкстнэ, конатнень регионось топавтынзе «Инфраструктура для жизни» нацпроектэнь эрямос совавтомань васенце иенть перть.
Башка мель явозель чадыведень шкантень анокстамонтень ды регионсонть коммунальной сеттнень одкстомтомантень, истя жо федеральной проектэнть лувсо. «Модернизация коммунальной инфраструктуры» федпроектэнть коряс Саранскойсэ эрязасто одкстомтовить ведень пачтямонь ды ведень отведениянь сеттне.
Кортамось истя жо мольсь од эрямо таркатнень строямодонть ды ошонь средань виевгавтомадонть. Росстатонь пачтямотнень коряс, 2025 иестэнть республикасонть максозь эрямонь таркатнень 310 тёжат кавонзазь метрат. Топавтови каладозь кудотнестэ одс эрицятнень ютавтомань программась - 2019 иестэнть саезь Мордовиясо истямо эрямо таркатнень 88,21 тёжат кавонзазь метратнень эйстэ ютавтозь 5 тёжадо седе ламо ломанть.
«Формирование комфортной городской среды» федеральной проектэнть лувсо тедеде Мордовиясо арсеви вадрялгавтомс общественной 30 таркат (2025 иестэ одкстомтозь 37 таркат). Тешкстазель общественной таркатнень вадрялгавтомань-мазылгавтомань коряс арсематнень ды мероприятиятнень анокстамонтень эрицятнень совавтомань эрявиксчись.
2026 ды 2027 иетнестэ республикасонть топавтовить вадрялгавтомань-мазылгавтомань коряс колмо проектт, конат изнясть ошонь вадря средань теемань сехте вадря проекттнэнь весероссиянь пелькстамосонть. Те Темниковасо Мокша леень чиресь, Инсар ошсо изнямонь скверэсь, Зубова Полянасо прявт площаденть ды ялго якамонь тарканть вадрялгавтомась.
Мордовия Республикань Прявтонь Пресс-службась