Чадыковонь 3-це чистэ Мордовиянь Правительствась ды Стратегической инициативатнень агентствась тешкстасть промышленной туризмань виевгавтомань коряс вейсэнь важодемадо вейсладямо. Истя жо кортасть вейсэнь важодемань ёнкстнэде, вейсэнь проекттнэнь топавтомадост.

«Неть ёнкстнэ токшить аволь ансяк бизнесэнь виевгавтоманть, минек вейсэнь повесткась топавтови республикань эрицятнень лезэс – те тонавтнемасо, шумбрачинь ванстомасо, социальной ёнкссо возможносттне, те ошонь средась, экологиянь туризмань виевгавтомась, - ёвтнесь журналисттнэнь марто кортамсто Светлана Чупшева. – АСИ-нть улить проектэнзэ, конат уш топавтовить лия регионтнэсэ, ламотнень эйстэст маласо шкастонть мереви нолдамс тесэ. Невтемакс, улить зярыя проектт ошонь средань виевгавтоманть коряс. Минек ули од ломантнень туртов лув – «Точка кипения», тердтянок федеральной экспертт, мельстуиця спикерт. Истят таркатне теевить республикасонтькак».

Мордовиянь Прявтонь тевтнень топавтыцясь лемдизе АСИ-нть региононь стратегической партнёрокс ды ёвтась кемема, вейсэнь важодемась карми лезэвекс. «Неян, меельце иетнестэ Стратегической инициативатнень агентствась пек эрязасто эскельдясь икелев, - мерсь Артём Здунов. – Миненек пек эрявить неть ёнкстнэ, кода ошонь средась, спортонь инфраструктуранть, чемпионатонь питнейчинть тевс нолдамось, научно-технической тонавтомась. Карматанок вейсэ важодеме ды витеме неть кевкстематнень».

Мордовия Республикань Прявтонть пресс-службась