Промксонь чинь повесткань прявт кевкстемась – мелят партиянь региононь отделениянь важодемань невтевкстнэ ды сыця шкантень прявт тевтне.
Артём Здунов тешкстызе, мелят саезель курс одкстоманть лангс, конань вельде партиянтень совасть од активистт. Течи партиянь прявт тевтнень ютксо – специальной военной операциянь участниктненень ды переселенецтнэнень лездамось.
«Васенце читнестэ саезь «Единой Россиясь» общественниктнень, бизнесэнь, бюджетэнь сферань ды эрицятнень марто вейсэ яви лезкс военнослужащейтненень ды сынст семиятненень. Партиянь Председателень общественной приемноенть юрсо спецоперациянть ушодовомсто саезь кармась важодеме «пси линиясь», переселенцтнэнень лездамонь куншкакурось. Сюкпря «Единой Россиянь» ды «Молодой Гвардиянь» волонтертнэнень, конат свалшкане важодить эйкакштнень марто нурька шкань улемань-аштемань таркатнесэ», – мерсь Артём Здунов.
Республикань Прявтось, партиянь региононь отделениянь секретаресь истя жо тешкстызе кочкицятнень кармавтомаст топавтомань ды Раськень программанть эрямос совавтомань башка эрявиксчинть. «Лезэнь кандыця важодеманть юрсо – кочкицятнень марто виде кортамось. Миненек эряви кирдемс ломантнень пельде минек лангс путозь покш кемеманть», – тешкстызе Артём Здунов.
Партиянь проекттнэнь топавтомадост кортамсто, партиянь региононь отделениянь секретаренть проектэнь тевдеемань ды од ломантнень марто важодемань коряс полавтыцясь Наталия Андрюшечкина тешкстызе, эрьва партпроектэсь – те эряза система, конась аравтозь те енкссо тевтнень ды стакачитнень топавтомантень. «Единая Россия» партиянь Мордовиянь региононь отделениясь 2022 иестэ топавтсь 20 федеральнойть ды 2 мобилизационнойть партиянь проектт. Прявтось сынст ютксо – вадря средань тееманть коряс, конань лувсо витнезь-вадрялгавтозь 10 общественной таркат ды кудотнень перька 14 таркат.
«Культура малой Родины» партпроектэнть лувсо од эрямо максови велень культурань кудотненень – витнезь культурань 10 организацият республикань 7 муниципальной районтнэсэ, нилетнесэ топавтозь педе-пев витнема. Проектэнь участникекс кармасть Мордовия Республикань Някань государственной театрась, «Крошка» актеронь ды някань театрась. Сценань оборудованиянть рамамс ды спектаклятнень путомс театратненень явозь весемезэ малав вете миллионт целковойть.
«Детский спорт» проектэнть коряс велетнесэ 8 спортонь залтнэнь витнемс явозель 15 миллиондо ламо целковойть. «Новая школа» проектэнь топавтомань лувсо педе-пев витнезь 12 общеобразовательной организацият. Тешкстазель, объекттнэсэ тевтнень топавтомаст мельга вансть «Единой Россиянь» пельде весе уровнянь депутаттнэ, партиянь активисттнэ, партиянь ено аштицятне, эрицятне.
Партиянтень совицятненень «Движение первых» эйкакшонь ды од ломанень весероссиянь общественно-государственной движениядонть евтнемстэ, региононь отделениянь советэнь Председателесь Дарья Радайкина мерсь, теезь движениясь ашти Россиянь эйкакшонь организациятнень кастомань-кепетемань историясонть од эскельксэкс. Сон уш ней вейсэнди эйкакшонь весе вейсэндявкстнэнь ды ванстасы минек масторонь воспитательной важодемань сехте вадря койтнень. Движениянь наблюдательной советэнть прявтсо масторонь Президентэсь Владимир Путин. Движениянь прявт девизэсь – «Улемс Россиянть марто, Улемс ломанекс, Улемс вейсэ, Улемс Движениясонть, Улемс васенцекс». Движениянь васенце Инекужось ветявсь ютазь иень ацамковсто Московсо. Эсест эйкакштнень мелест коряс республикань школатнесэ теевить организациянь первичной отделеният. Течи эйстэст уш 36. Минек республикасо движениянь наблюдательной советэнть прявтсо Артём Здунов. Мордовиясь – масторонь келес васенцетнень ютксо эйкакштнень ютксо движениянь шаштоманть коряс. Прявт тевесь течи – совавтомс движениянтень седе ламо од ломанть.
Промкссонть истя жо кунсолозь МР-нь Госсобраниясо ды Саранск ошонь округонь депутаттнэнь советсэ «Единой Россиянь» фракциянть тевдеемадонзо, истя жо партиянь общественной приемноенть важодемадонзо пачтямотне.
Меельцекс ютавтовсь наградатнень явшемась. Благодарственной сермат явшезь «Лучший секретарь первичного отделения партии 2022» региононь пелькстамонь изницятненень, «Мобильное приложение «ВВЕРХ» проектэнь региононь лидертнэнень. Истя жо «Единая Россия» партиянь Генеральной советэнь Секретарень Благодарность яволявтозь предпринимательтненень, конат лездасть воинской подразделениятненень, специальной военной операциянь участниктнень семиятненень.
Тешкстазь вейсэнь важодемадо вейсладямо партиянь региононь отделениянть ды «Российский союз ветеранов Афганистана», «Объединение семей с детьми «Много дети» ды «Российский Союз Молодежи» региононь общественной организациятнень ютксо.