Мария Васильевна чачсь Калининской областень Тургиновской районсо, тосо эрясь тетянзо-аванзо марто 1930 иенть видьс. Мордовияв семиясь сась, зярдо Мариянень топодсть 7 иеть. Школав тусь Ромодановань енксонь Красный Узел поселкасонть. Мейле тонавтнесь Ицялонь енксонь Велень хозяйствань техникумсонть – ней «Кемлянский аграрный колледж». Колмоце курссо ялганзо марто эсь мелест коряс тусть фронтов. Мордовиясто фронтов сыргась тейтерь-авань цела эшелон... Понгсь Саратовасо СВО-нь войскатнес ды служась телефонисткакс. Мейле - Польша, Варшава, войнанть прядызе Германиясо, Айзенберг ошсонть. Ледстни, селекторонть коряс пачтясть изнямодонть, эзть кемезеве, мейле – авардсть ды пейдсть... Течи Мария Васильевна васты инжетнень наряжазь – мештесэнзэ медальть - «За победу над Германией в Великой Отечественной войне 1941-1945 гг.», «Отличный связист» тешксэсь, войнань иень ламо лия наградат.
Изнямодо мейле Мария Васильевна велявтсь Мордовияв. Тетянстэнзэ-аванстэнзэ макссть мода Саранскойсэ, кармасть кудонь строямо. Сестэ Мария теевськак содавиксэкс сы шкань мирдензэ марто. Николай важодсь шоферэкс, усксесь строямонь материалт. Семиянтень лездамга, косо кассть эште кавто ялаксонзо, Мария Васильевна кармась важодеме кинопрокатсо учетчицакс, теке шкане кармась тонавтнеме университетэнь экономикань факультетэнь чокшнень отделениясонть. Тонавтнемадо мейле важодсь «Волгонефтехиммонтажсо» прявт бухгалтерэкс. 1973 иестэ кучозель Чебоксаров отраслянь виевгавтоманть туртов ды 1,5 иенть ютазь велявтсь Мордовияв, ламо иеть важодсь «Саранскспецстройсэ». Вадря важодеманть кисэ казезь ламо благодарностьсэ ды грамотасо. Республикань Прявтонтень Мария Васильевна евтнесь, кода важодемань тевдееманть шкасто бороцясь саламотнень каршо – «бюджетэнь эрьва целковоенть кисэ сэредсь оймем!»
Уш 40 ламо иеть Мария Васильевна целанек алтызе эсь прянзо семиянтень. Нуцьканзо сеедьстэ сакшныть, ули правнуцьказояк, весе мель марто кунсолыть бабанзо эрямодонзо. Зярдо кортазевсть седе, кода Мария Васильевна ульнесь Сурань рубежень строямосонть, Артём Здунов евтась мель нолдамс тевс сонзэ артовксонть Покш Березникень енксо Николаевка веленть маласо мемориальной комплексэнь стявтомань пингстэ вейке горельефенть туртов. «Тынк тердтядызь комплексэнть панжомо, ансяк, инескеть – уледе шумбра!» – мерсь Мордовиянь Прявтось.
Мордовия Республикань Прявтонь пресс-службась