Тешкстазель, ютасть вастовомат федеральной руководительтнень марто. РФ-нь Минздравонь прявтонть Михаил Мурашко марто ваннозь республикань шумбрачинь ванстомань первичной звенань ды репродуктивной политикань одкстомтомань кевкстематне. Россельхознадзоронь руководстванть марто вастовомась токшесь Мордовиянь производительтнень важодемаст. Ушодовсь Азербайджанонть ды Узбекистанонть марто ероков вейсэнь тевдеемась, ансяк региононть туртов прявт ёнксось – те Китаесь.
Артём Здунов башка тешкстызе «Россети» ды «Русгидро» компаниятнень руководительтнень марто вастовоматнень эрявиксчинть – те Мордовиянь промышленной предприятиятнень продукциянь прявт потребительтнестэ вейкесь. Невтемакс, форумонть лувсо вастовоматнень ды Поставщикень читнень ютавтоманть вельде «Русгидросо» миемань покшолматнень удалась кастомс чавосто кавто миллиардт целковойс.
Промышленностень виевгавтомань Фондонть марто тешкстазь вейсладямонть лувсо од инвестпроектэнть ушодсы «Промомед» КГ-сь. Малав миллиард целковойть явовить «Биохимик» заводонтень чуросто вастневиця орматнень лецямс препараттнэнь теемантень. Республикань кемевикс партнёронть, Россельхозбанконть марто келейгавтови «Органика детям» проектэсь - ловсонь органической продукциясь совавтови Саранскоень школань начальной классонь тонавтницятнень ярсамопелентень.
«Течи вастовинек «Синара» Группань руководстванть марто -таркасто таркас шаштневиця составонь производителенть. Тешкстазь вейсладямо Саранскойсэ троллейбустнэнь пурнамонь производствань нолдамонть коряс. Одт, неень шкань, автономной молема марто – истят невтевкстнэ лездыть нолдамс сынст натой тосо, косо арась контактонь сеть. Прявт вейсладямо тешкстазь «Газпромонть» марто – региононь предприятиятнень покш технологичной продукциянть компаниянть лезэс тевс нолдамодонзо. Сынст пек покш тевс нолдамост, минь свал бороцятано минек товартнэнь миеманть кисэ», - тешкстызе Артём Здунов.
Республикань руководителесь ульнесь зярыя сессиятнесэ. Вейкесь эйстэст алтазель Культурань ушодкстнэнь Президентэнь фондонь вете иетненень - сядот миллионт целковойть грантт уш явозь шкинемань ломантненень лездамга ды Мордовиянь креативной индустриятнень виевгавтомга.
Бизнесэнть марто вастовоматне ютавтовсть ПМЭФсэ-2026 Мордовиянь команданть важодемань колмо читнень перть – тень туртов республиканть важодсь кортамонь ветямонь нупалезэ, продукцияст невтизь зярыя предприятиятнень руководительтне. Истя, региононь стратегической партнёронть – «Напитки Вместе» компаниянть марто кемекстазь вейсладямо симемапельтнень производствань покшолматнень ванстоманть коряс, конат максыть республикантень акцизной покш пачтямот.
«Эрьва иестэ минь учотано регионтнэсэ инвестициянь климатонь национальной рейтингень цетавкстнэнь, секс мекс сон алкукс объективной, сонзэ теи профессионалтнэнь покш командась, - мерсь республикань руководителесь. - Мордовиясь кадови инвестициянь коряс мельстуиця кемень субъекттнэнь юткс: минь аволь умок тов совинек ды а арсетяно максомс эсенек таркантт. Кепедевинек вейке чалгамос тедеде. Кементнень ютксо улемстэ кепедевемс аламодо седе стака, ансяк мон истямо тев команданть икелев путан. Секс мекс бизнесэнть туртов Нацрейтингесь – те невтевкс, эйсэнзэ таркась канды покш смусть: зярдо регионось сови кементнень юткс, бизнесэсь бажи ды яви мель сонзэ лангс!»
Мордовия Республикань Прявтонь Пресс-службась