Мордовия Республикань котоце тердемань Государственной Собраниясь пряды важодеманзо. Таштамковонь 14-це чистэ ютавтовсь меельце ведьгемень вейксэце сессиясь, тосо ульнесь Мордовиянь Прявтонь тевтнень топавтыцясь Артём Здунов.
Депутаттнэ совавтсть полавтомат законодательстватнес. Вейкесь юткстост - «О налоге на имущество организаций» МР-нь Законось. Документэсь лезды организациятненень, кить явшить веденть симемань ды промышленной тевтнес.
Депутаттнэ ве мельсэ кирдизь «О регулировании отношений в сфере организации и проведения капитального ремонта» Закононть.
Истя жо кемекстазь ушодксось, конань вельде шождалгавтови "гаражонь амнистиядо" мейле гаражтнень ды модатнень лангс ломантнень праваст теевтемась.
Депутаттнэ истя жо совавтсть полавтомат «О регулировании земельных отношений на территории Республики Мордовии» Закононтень. Документэнть коряс, сетнень юткс, кинень питневтеме явовить модань участкат, совавтозь медиктне, кить састь важодеме велетнес.
Вете иень перть важодемадонть кортамсто, МР-нь Государственной Собраниянь Председателесь Владимир Чибиркин тешкстызе, депутаттнэ алкуксокс важодсь ламот социально-экономической кевкстематнень коряс, примасть республиканть туртов эрявикс законт. Сон евтась сюкпря депутаттнэнень важодеманть кисэ.
- Минь ютавтынек 59 сессият, конатнесэ ваннозь 721 кевкстема. Примазь 506 законт ды 598 постановленият, ваннозь Федеральной Закононь 4834 проектт, лия региононь законодательтнень 723 ушодксост. Ютавтынек публичной кунсоломат, кругловой стольть, семинарт, Од депутатонь школа. Сюкпря важодеманть кисэ, - мерсь Владимир Чибиркин.
Мордовиянь Прявтонь тевтнень топавтыцясь Артём Здунов кармавтсь депутаттнэнень ванстомс региононь парламентэнть ды властень исполнительной органтнэнь важодемань лувонть.
- Се шкастонть, зярс тесэ важодян, марян лезэв вейсэнь тевдееманть, содан, минь важодтяно вейке командасо. Курок витевсть путозь тевтне, арасельть кодаткак пелькстамот. Те лувонть эряви пачтямс сыця тердематненень. Те вадря практика. Сон лезды куроксто молемс икелев, седе пек финанстнэнь коряс. Минь эзинек нолда региононть домка латкос прамонть. Эрязасто важодсть комитеттнэ, комиссиятне, башка депутаттнэ вейсэндявсть федеральной центранть марто важодемантень, тень кисэ покш сюкпря, - мерсь Артём Здунов.
Мордовиянь лидерэсь тешкстызе, апак вано финансонь стакачитнень лангс депутаттнэнь марто лезэв вейсэнь важодеманть вельде республикасонть эзь лотка вейкеяк стройкась, явозь башка ярмакт.
- Минь эскелятано икелев! Кеман, Госсобраниянь од тердемась карми ладямо те покш уровнянтень, конась путозь неть вете иетнень перть, - мерсь Артём Здунов.
Сессиянть прядовомга явшезь государственной наградат. Славань II степенень Орденсэ казезь Госсобраниянь социальной политикань коряс комитетэнь председателесь Рафаиль Аширов.
«Известия Мордовии»