Московсо чадыковонь 14-це чистэ ютавтовсь Россиянь Госсоветэнь президиумонть ды Стратегической инициативатнень агентстванть вейсэнь промксонтень анокстамонь коряс семинарось. Регионтнэнь прявттнэ, властень федеральной органтнэнь представительтне ды эксперттнэ ваннызь кевкстематнень, конат сюлмавозь Национальной социальной ушодкстнэнь (НСИ) топавтомаст марто. Важодемасонть ульнесь Мордовия Республикань Прявтонть тевтнень топавтыцясь Артём Здунов.
Промкстонть икеле участниктне якасть Московонь Мещанской районсонть «Моя работа» эрицятнень занятостень куншкакуронтень ды Арбат районсонть 38№ ошонь эйкакшонь поликлиникань 2№ филиалонтень, теевсть содавиксэкс, кода эрицятненень явовить социальной услугатне.
Семинарсонть кортавсть социальной ёнкссонть услугатнень доступностесь ды вадрячись, се, кодамо лувсо сынь явовить эрицятненень, барьертнэ ды ограничениятне, истя жо НСИ-нь лувось ды регионтнэсэ сонзэ топавтомась. Вастовомантень пурнавозетне истя жо явсть мель соцуслугатнень, медицинань лезксэнь, тонавтомань, эрицятнень занятостень сферасонть услугатнень получамсто башка тевтненень.
«Тевесь сеньсэ, полавтовозо ломантнень эрямост, сыненст улезэ вадря. Секскак те кортамось, конань ушодызе Стратегической инициативатнень агентствась, пек эряви», - мерсь президентэнь администрациянь руководителень васенце полавтыцясь Сергей Кириенко.
Сонзэ валонзо коряс, «седе тов важодеманть ладиця тевтнес ютамсто, эряви ванномс опытэнть ды весементь сехте вадрянть, мезе тееви регионтнэсэ».
«Кевкстематне, конатнеде минь кортатанок, токшить минек важодемань покш пельксэнть – бюджетэнь 60-70% ютавкстнэ савтовить тонавтомань, шумбрачинь ванстомань, эрицятнень социальной ванстомань ды занятостень енкстнэс. Бюджетэнь сферасо 70% важодицятне – важодить неть енкстнэсэ, те миллионт ломанть, конат эрьва чистэ якить важодеме ды явить лезкс, услугат минек масторонь весе эрицятнень туртов», - пачтясь Московонь мэрэсь Сергей Собянин.
Промкстонть мейле ёвтавить мельть-арсемат соцсферасо услугатнень явомань коряс процессэнть вадрялгавтомга. Арсеви, седе мейле, кода Россиянь правительствась анокстасы НСИ-нь целевой модельтнень, регионтнэ нолдасызь сынст тевс.
Россиянь Госсоветэнь президиумонь ды АСИ-нь вейсэнь промксось ютавтови чадыковонь 15-це чистэ. Пачтямо марто пшкадить Госсоветэнь «Социальная политика» енксонть коряс комиссиянь председателесь, Новгородской областень губернаторось Андрей Никитин, вице-премьерэсь Татьяна Голикова, АСИ-нь прявтось Светлана Чупшева, Москвонь мэрэсь Сергей Собянин.
Россиянь президентэнть Владимир Путинэнь кармавтоманзо коряс НСИ-нь ушодкстнэнь топавты АСИ-сь. НСИ-сь – те ломантнень эрямост вадрялгавтомань коряс федеральной ды региононь тевть. 2020 иестэнть НСИ-нь механизматне нолдавсть тевс Новгородской, Нижегородской, Кемеровской, Калининградской, Сахалинской областтнесэ ды Башкириясо. 2021 иестэ НСИ-сь нолдави тевс весе масторонть келес.
Проектэсь токши ниле енкст – тонавтома, шумбрачинь витема, социальной обслуживания ды важодема таркань муема. Эрьвасонть кочказь сеедьстэ ватсневиця 10 тевть, конатнень марто эряви важодемс: невтемакс, максомс эйкакшонть эйдень кужов, получамс амбулаторной эли стационарной медицинань лезкс, теемс-анокстамс соцобслуживания сыре ломаненть туртов, получамс эйкакшонь пособия эли муемс важодема занятостень куншкакуронть вельде.
Мордовия Республикань Прявтонть пресс-службась