Панжиковонь 9-це чистэ Саранскойсэ ды республикань районтнэсэ ютавтовсть кенярксчинь мероприятият, конат алтазь 1941-1945 иень Ине Отечественной войнасо Изнямонь 76 иетнень топодемантень. Изнямонь площадьсэнть ютавтовсь митинг-реквиев, воинэнть-олякстомтыцянть подвигензэ ледстямо пурнавсть малав 7 тежат ошонь эрицят ды инжеть. Почётонь таркатнесэ аштесть войнань ды трудонь ветерантнэ, войнань эйкакштне. Трауронь митингенть ушодовомадо икеле сынст марто лембестэ кортась Мордовиянь Прявтонть тевтнень топавтыцясь Артём Здунов. Республикань руководителесь лепштинзе кедест ды кортась войнань эрьва участникенть ды тылэнь важодицянть марто.
Мордовиянь Прявтонть тевтнень топавтыцясь Артём Здунов пшкадсь пурнавозетненень шумбракстнемань ды поздоровонь вал марто: «Минек вечкевикс фронтовикть ды ветерант! Офицерт, военнослужащейть! Мордовиянь мельвановикс эрицят ды инжеть! Течи минек масторонь прявт кенярксчись! Арась истямо семия, конась бу аволь печтя ёмавксонь покш зыянонть. Миненек а эряви стувтнемс седе, мезе ульнесь. Фашисттнэнь прявт тевекс ульнесь явомс минек масторонть раськень ды религиянь тешкстнэнь коряс. Ансяк фашистэнь пропагандантень те эзь топавтово. Ней минь нейтянок, кода масторлангонь аренасонть бажить вельмевтемс неть варчамотнень, ды миненек эряви а нолдамс тень! Миненек а эряви стувтнемс, минек сантнэсэ чуди изниця раськенть вересь! Ды сеть стакачитне, конатнень марто Мордовиясь вастови течи, марявить пек вишкинекс сетнень коряс, мезе ульнесь войнань иетнестэ. Минь изнясынек неть стакачитнень. Минь изнясынек сеттнень, кить бажить ваявтомс Россиянть, яжамс сонзэ экономикань потенциалонть, салыть эсест раськест кедьстэ. Ине Изнямонь Чинть марто!»
Артём Здунов тешкстызе, изницятне свал кармить Россиянь эрицятнень туртов невтемакс весемесэ – патриотизмасо, важодеме вечкемасо, эрямонтень ды ломантненень мелень явомасо. Войнань иетнестэ фронтов тусть Мордовиянь 246 тёжат церанзо ды тейтерензэ. Эрьвась омбоцесь эзь велявто. Региононь руководителесь тешкстызе, раськень те подвигенть коряс ледстнематне свал кармить эрямо изнямонь нуцькатнень седейтнесэ. Мордовиясо чачозетне топавтсть героической подвигть весе фронтнэсэ: Брестэнь крепостенть, Московонть, Ленинградонть, Севастополенть ванстомасо, Сталинградонть ало ды Курской дугасонть, Украинань ды Белоруссиянь модатнень лангсо тюрематнесэ, Европанть олякстомсто ды Берлинэнть саемстэ. Сынст ютксо полководецт ды рядовойть, летчикть ды танкистт, разведчикть, морякт, партизант, медсестрат. Весе сынь – армиянь генералонть Пуркаевень эйстэ саезь тюремасо маштовозь кинооператоронть Сущинскоень видьс – максызь ятонть лангсо изнямонтень весементь, мезенть машсть. Республикань руководителесь ледстизе весе масторлангонть келес содавикс Девятаевень подвигенть. «Мордовиясо ламо геройть. Сынст ютксто вейкесь - Михаил Петрович Девятаев, сон маштсь «оргодемс адстонть». Истят тевть масторлангсо арасельть! Свалшкань ледстнема истят геройтненень», - мерсь Артём Алексеевич.
Парадсонть ульнесть юнармеецт, поисковикть, казакт ды кадетт. Прявтонть тевтнень топавтыцясь пшкадсь тенст: «1941 иестэнть самай истят од ломантне, кода тынь, тукшность фронтов. Сынст ульнесть эсест арсемаст эрямонть лангс, сынь арсесть пурнамс семият, кастомс эйкакшт, касомс-кепетемс профессиясо. Ансяк неть мельтне-бажамотне эзть топавтово. Тенесэ войнань зыянось. Мон ёвтан сюкпря весенень, кие яви мель од ломантнень нравственной ды патриотизмань лувсо кастомантень. Те пек эрявикс».
Од ломантнень пельде ветерантнэнень ды митингентень-реквиементень пурнавозетненень пшкадсь 38№ общеобразовательной школань тонавтницясь Данила Шевнин. «Минек семиясо а стувтнить ды содыть минек сыре покштятнень ды бабатнень ине тевдест. Монь сыре покштям ульнесь пехотасо рядовоекс, казезь «За Отвагу» медальсэ, - ёвтнесь од ломанесь. – Покштятнеде-бабатнеде ледстнематнень мон карман ванстомо свалшкане. Вечкевикс ветерант, минь, од ломантне, ёвтатанок тенк сюкпря пря велькссэ ванькс менеленть, оля масторосо эрямо, вечкеме ды кенярдомо возможностенть кисэ».
Теде мейле путовсть цецят 1941-1945 иень Ине Отечественной войнасо маштовозетненень кеврунгонтень. Яволявтозель чатьмонемань минута, теде мейле колмоксть ледсть ружиятне ды «День Победы» моронть гайгеманзо марто менельс нолдазельть гулькатне – сэтьмечинь тешкстнэ ды Россиянь флагонь туссо шартнэ.
Митингтэнть мейле Саранскоень Изнямонь площадьганть ютась парадось.
Мордовия Республикань Прявтонть пресс-службась