Артём Здунов: "Карматано виевгавтомо серой зарплататнень каршо бороцямонть"

Артём Здунов: "Карматано виевгавтомо серой зарплататнень каршо бороцямонть"

Мордовиянь Прявтось Артём Здунов сундерьковонь 24-це чистэ ютавтсь промкс Правительствань члентнэнь марто инвестициятнень тердемань ды важодемань таркатнень теемань кевкстематнень коряс. Промксонтень пурнавозетне кортасть республикань важодемань рынкасонть тевтнеде. 

Республикасонть 9 ковтнень коряс тевтеме аштицятнеде 3,5%, те 1,5% седе аламо 2020 иень теке шкантень. Сундерьковсто тевтеме аштицятнеде тешкстазь - малав 3,5 тежат ломанть (2021 иень якшамковонь 1-це чинтень ульнесь 11 тежат ломанть). 

Республикасонть анокстазь инвестициятнень тердемань аравтлув, сонзэ коряс 2024 иентень арсеви топавтомс инвестициянь 161 проект. Те лезды теемс 5800 важодемань таркат. Тешкстазель, те иень 9 ковтнень перть теезь 653 важодемань таркат - те икельди аравтлувонь невтевкстнэнь. 

Промкссонть домкасто ваннызь весе министерстватнева важодемань таркатнень тееманть коряс аравтлувонть. Республикань Прявтось тешкстызе, министерстватненень эряви седе эрязасто важодемс грантонь пелькстамотнень коряс. "Гранттнэ явовить общественной организациятненень, конат неть ярмактнень лангс теить важодемань таркат. Эряви лездамс тенст сермадомс яволявтомат неть гранттнэс, изнямс сынст - эдь те важодема ломантнень туртов!" - мерсь Артём Здунов. 

Грантонь пелькстамотнесэ улеманть коряс Мордовиясь зярс кадови лия регионтнэнь эйстэ. 

Мордовиянь Прявтось тешкстызе, эряви виевгавтомс серой зарплататнень каршо бороцямонть, сынь кандыть редявикс емавкс республикань бюджетэнтень. 

Мордовия Республикань Прявтонь пресс-службась