Ледстясынек, ютазь пецясто ушодовсь Саранскоень аэропортсо раськеютконь рейстнэнь лангс билеттнэнь микшнемась. Панжиковонь 28-це чистэнть саезь ожоковонь 23-це чинть видьс карми важодеме «Анталия – Саранск – Анталия» маршрутонть коряс авиарейс – 10 чис 1 оборотной рейс.
Вастовомантень пурнавозетненень пшкадемстэ, Артём Здунов тешкстызе: Мордовиянть туртов те историянь тев, эрьва ие республикасонть авиациясь карми яла седе сюпав. «Федеральной центранть лезксэнзэ вельде минь тейтяно условият авиасообщениянь свалшкань важодемань топавтоманть туртов. Прявт тевекс ульнесь туристической енкстнэнь коряс ливтнематнень туртов раськеютконь коштонь перевозкатнень панжомась аволь ансяк республикань эрицятнень, истя жо шабратнень туртов», – тешкстызе региононь руководителесь.
Республикасонть нолдазь тевс коштонь перевозкатнень виевгавтомань коряс программа, коштонь транспортонь организациятнень субсидирования. Ней региононь авиаперевозкатне ветявить Москов, Санкт-Петербург, Сочи, Минеральные Воды ды Казань оштнень видьс. Панжиковонь 5-це чистэ панжови маршрут Махачкаланть видьс. Саранскоень аэропортось касы-кепети – 2023 иестэ пассажиртнэнь усксемась ламолгадсь колмоце пельксэс икеле иенть коряс.
Тешкстазель, Россиянь Минтрансонть, Росавиациянть ды Росгранстроенть марто вейсэнь тевдееманть пингстэ топавтозь инвестициянь проект – сонзэ топавтомас явозь 1 млрд целковойть - федеральной бюджетэнь ды инвесторонь («Новапорт Холдинг»). Нолдамонь коштонь пунктонь витнемань ды технической оснащениянь пингстэ одкстомтозь авиационно-технической базань зданиясь, косо теезь пограничной контролень, раськеютконь коштонь линиятнень подразделениятне. Весе тевтне ютавтозь нурька шкас – 1 ие ды 4 ковт.
«Башка сюкпря Россиянь Транспортонь министрантень Виталий Геннадьевич Савельевнень. Даволковсто сон сакшнось республикав, минь домкасто кортынек проектэнть коряс. Ды те иень даволковонь 13-це чистэ лиссь Россиянь Минтрансонь приказ – Саранскоень раськеютконь аэропортсонть панжозь государственной границянть трокс коштонь грузопассажирской свалшкань ламо енксонь нолдамонь пункт. Республиканть ули мелезэ седе тов виевгавтомс Саранскойстэ раськеютконь авиарейстнэнь, ваннотано авиаперелётт лия енкстнэнь коряс», – мерсь Артём Здунов.
Мордовиянь Прявтось евтась сюкпря Мордовиянь авиациянь виевгавтомасо улеманть кисэ, профессионализманть, тевентень кемевиксчинть кисэ ды явшесь казнеть.
Мордовия Республикань Прявтонь пресс-службась