Республикань Прявтось тешкстызе: Тундонь ды Трудонь Чись – кенярксчи, конась вейсэнди весе обществанть. «Евтан покш сюкпря производствань весе отраслятнень ды социальной сферань представительтненень. Сень эйстэ, кода виевстэ кармить важодеме минек предприятиятне, видьстэ ашти порядокось ды стабильностесь, вандынь чинтень ломантнень кемемась», – мерсь республикань руководителесь.
Мордовиясь тедедеяк кирди важодемань эряза лувонть. Икеле чистэнть, кода тешкстызе Артём Здунов, пилоттомо технологиятнень коряс республикань проектэсь невтезель масторонь Президентэнтень ды сон макссь покш питне. «Те минек Мордовиянь инновациянь од системань пелькстнэнь ютксто вейкесь, – мерсь региононь руководителесь. – Евтан покш сюкпря весе инвестортнэнень, кие кеми Мордовиянть эйс».
Неень шкане республикасонть топавтовить инвестпроектт, инвестициятнень вейсэнь покшолмасо – малав 40 млрд целковойть. Республиканть касомань вадрят невтевксэнзэ промышленностесэ, велень хозяйствасо. Весе неть изнявкстнэ, кода тешкстызе Артём Здунов, топавтовить эрьва кодат профессиянь ломантнень кедьсэст.
Республикань Прявтось башка тешкстызе: ней кода зярдояк пек эряви вейсэндявомась, истя жо важодемань. Ансяк вейсэ мереви топавтомс сехте стака тевтнень. Региононь лидерэсь евтась сюкпря предприятиятнень руководительтненень ды важодемань коллективтненень СВО-нь участниктнень ды сынст семиятнень кирдемаст кисэ. Те истя жо вейсэнь покш тев.
Артём Здунов истя жо евтась сюкпрянь валт государствань прявтонтень. «Кода минь содатано минек Президентэнь Кучомастонть, улить одкстомтозь национальной проекттнэ. Минек кармить од проектт од семиятнень, од ломантнень кирдемаст коряс. Те минек туртов пек эрявикс», – мерсь Мордовиянь Прявтось.
Россиянь Социальной фондонь председателесь Сергей Чирков кенярксчинть кувалма республикань эрицятненень поздоровонь евтамсто, тешкстызе: «Мордовиясь – важодеме вечкиця! Мон тень содаса. Экономикань истямо касомась-кепетемась, конань невти республикась, пек питней. Монь туртов покш честь улемс те мероприятиясонть, седе пек сень мельсэ кирдезь, што Мордовиясь монь туртов тиринь – бабам чачсь Зубова Полянань енкссо. Сюконян эрьва важодицянтень ды трудонь весе династиятненень».
Кенярксчинь промкссонть тешкстазь важодемань пелькстамонь изницятне. Промышленностень предприятиятнень ютксо изницянь кедьстэ кедьс ютыця знамясь максозь Саранскоень приборостроительной заводонь, Орданьбуень светотехнической заводонь, «Лидер – Компаунд» АО-нь важодемань коллективтненень.
Агропромышленной отраслясонть изницякс кармасть «МордовАлкоПром», «Октябрьская» агрофирмась, Рузаевкань муниципальной райононь «Исток» ООО-сь, строямонь отраслясо – «Мордовдорстрой» ды «Анелия».
Жилищно-коммунальной хозяйствань енкссонть изницянь знамясь максозь «Россети Волга» публичной акционерной обществань филиалонь – «Мордовэнергонь» важодемань коллективентень, информатизациянь ды связень отраслясонть - «Россиянь Почтань» региононь управлениянтень.
Шумбрачинь ванстомань отраслясонть сехте вадрякс кармасть Республикань 5№ кклинической больницянь ды Рузаевкань центральной районной больницянь коллективтне, образованиянь енкссонть – Республикань ероков эйкакштнень туртов лицеень ды Торбеевань сывелень ды ловсонь промышленностень колледжень коллективтне, культурань енкссо – Мордовия Республикань А. С. Пушкинэнь лемсэ Национальной библиотекань коллективесь, социальной обслуживаниянь енкссонть – Зубова Полянань муниципальной райононь Потьмань эйкакшонь отделения марто психоневрологической интернатонь коллективесь ды Ицялонь райононть коряс Социальной ванстомань учреждениянь коллективесь.
Предпринимательствань енкссо предприятиятнень юткссо важодемань пелькстамонь изницянь знамясь максозь «Констант» ООО-нь, «Потребкооперация» отраслясонть – «Большеигнатовское» потребительской обществань коллективентень.
Мордовия Республикань Прявтось 2024 иенть яволявтызе Важодемань династиятнень иекс. Важодемань династиятне – куш-кодамо коллективень каштанчи ды нежедькс.
Мордовия Республикань Прявтонть Указонзо коряс семиянь важодемань койтнень-кирдатнень кемекстамонть кисэ «Лучшая трудовая династия Республики Мордовия» Почетонь дипломсо ды тешксэ казезь Панинтнэнь династиясь, сынь важодить «Ардатовский светотехнический завод» акционерной обществасонть. Панинтнэнь династиянь вейсэнь важодемань стажось – 176 иеть.
«Лучшая трудовая династия Республики Мордовия» почетонь дипломсо ды тешксэ истя жо казизь Давыдовтнень династиянть – сынь важодить «Рузаевский завод химического машиностроения» акционерной обществасонть. Династиянь вейсэнь важодемань стажось – 162 иеть.
Казне истя жо максозь Мазоновтнень династиянтень, сынь важодить «Мордовцемент» акционерной обществасонть, ды Зуботыкинтнэнь династиянтень – сынь важодить образованиянь енкссонть.
Важодемань династиянь эрьва членэнтень пандови вейке шкань ярмаконь премия – 1000 целковойть важодезь эрьва иенть кисэ.
Кенярксчинь промксонтень пурнавозетненень поздоровт истя жо евтась Мордовия Республикань Профсоюзтнэнь федерациянь председателесь Сергей Борисов. Ютавтовсь «Коллективный договор – основа защиты трудовых прав работников» эрьва иень пелькстамонь изницятнень каземась. Пелькстамосонть невтезельть азорксчинь весе форматнень предприятиятне ды организациятне.
3 степенень лауреатонь дипломось Ковылкинань электромеханической заводонтень ды «Газпром газораспределение Саранск» АО-нь.
2 степенень лауреатонь дипломось максозь «Сарансккабель-Оптика» ООО-нь.
1 степенень лауреатонь дипломось максозь «Ликероводочный завод «Саранский» ООО-нь.