Мордовиянь Прявтонь тевтнень топавтыцясь Артём Здунов якшамковонь 16-це чистэ Темниковань ёнкссо важодемань коряс улемстэ макссь питне ошонть вадрялгавтомань коряс аравтлувтненень. Темникова ёнксонь прявтось Сергей Кизим ёвтнесь, 2018 иестэнть Мордовиянь сехте сыре ошось изнясь Ошонь комфортной средань проекттнэнь Весероссиянь пелькстамосонть «Малые города с численностью населения до 10 тыс. человек» номинациянть коряс, сонензэ максозь грант 30 млн целковоень покшолмасо. 2019 иестэнть Темниковасо топавтозь проект ошонь куншкакуронть вадрялгавтоманзо коряс, тов истя жо совасть культурань ды оймсемань паркось, Славань аллеясь, Урьвакстыцятненень-мирденень лисицятнень аллеясь, прявт площадесь.
2019 иестэнть Темниковась таго изнясь пелькстамосонть, сонензэ явозь 50 мон целковойть Совесткой Союзонь Героенть С.В. Астраханцевень лемсэ парконть витнемс-вадрялгавтомс. Общественной тарканть кочкамось кемекстазь ошонь эрицятнень марто. Мордовиянь Прявтонь тевтнень топавтыцясь оймсемань сы шкань тарканть ванномсто кортась эрицятнень марто, кунсолынзе парконть витнемань коряс арсемаст. Грантонть вельде тесэ теевить оймсемань ды спортонь ламо таркат, эйкакшонь ды канатонь паркт, кафе, беседкат ды гриль-кудынеть. Проектэсь топавтови тедеде. Артём Здунов кирдинзе муниципальной образованиянть ушодксонзо ошонть вадрялгавтомга-одкстомтомга ды неень шкань инфраструктуранть теемга.
Мордовия Республикань Прявтонть пресс-службась