Мордовиянь Прявтонь тевтнень топавтыцясь Артём Здунов якшамковонь 21-це чистэ ютавтсь промкс республикань китнень лангсо ардомань правилатнень коламонь фотовидеофиксациянь комплекстнэнь путомаст коряс. Ледстясынек, ацамковонь прядовомсто республикань руководителесь кармавтсь правительствантень ковонь перть одкстомтомс комплексстнэнь важодемаст. Сестэ фотовидеофиксациянь 207 комплексстнэнь эйстэ важодсть ансяк 94-тне, ГИБДД-в административной правань коламотнень коряс постановлениятнень анокстамс материалтнэ пачтявсть ансяк 35-тнестэ.
Седе, мезе те шканть перть теезь, пачтясь республикань Информатизациянь ды связень министрась Игорь Вольфсон. Мерсь, ней важодить фотовидеофиксациянь 186 комплекст, ГИБДД-в фотовидеофиксациянь материалтнэ пачтявить 111-стэ, постановлениятне ливтевить 66 комплекстнэстэ. Игорь Вольфсон яволявтсь, ПДД-нь коламотнень редямонь региононь системась целанек карми важодеме даволковонть прядовомс. Артём Здунов кармавтсь, те шкантнень республикань китнень лангсо фотовидеофиксациянь системась улезэ анок 100 проценттс.
Республикань Прявтонь тевтнень топавтыцясь тешкстызе, эряви путомс комлекст истямо покшолмасо, кода тень веши ГИБДД-сь: «ГИБДД-сь ванны китнень лангсо зыянонь лисема таркатнень, косо седе сеедьстэ колавить ардомань правилатне, эряви нежедемс неть цифратнень лангс. Бути эряви путомс тракасто таркас шаштневиця эштё 25 комплекст – тень эряви куроксто теемс! Ледстяса – кортамось моли ломантнень эрямодост ды шумбрачидест!»
Мордовия Республикань Прявтонть пресс-службась