Эйкакштнень кизэнь оймсемаст анокстамонь кевкстематне кортавсть течи, чадыковонь 7-це чистэ, Мордовиянь Прявтонь тевтнень топавтыцянть Артём Здуновонь кедьсэ промкссонть. Зярс региононь руководителесь топавтозь важодеманть лови асатыцякс. Те прявт ёнксось веши вадря анокстамо, седе пек се, мезесь токши эйкакштнень ютко шкаст ютавтоманть ды сэтьмечист ванстоманть.
Кода пачтясь МР-нь Правительствань Председателень полавтыцянь тевтнень топавтыцясь Галина Лотванова, тедеде арсеви панжомс 337 лагерть, 22-тне юткстост стационарнойть (санаториятнень юрсо), ды 315 лагертне чить улемань (тонавтнемань организациятнень ды социальной учреждениятнень юрсо). Текень пингстэ правительствань зампредэсь тешкстызе, республикасонть эйкакштнень кизэнь оймсемаст туртов икеле важодиця 23 лагертне а панжовить – сынь пек таштомсть.
Кизна республикасонть оймсеме ды шумбрачист витеме кармить малав 20 тёжат эйкакштне, ютксост малав 8 тёжатне понгсть эрямонь стака шкас. Истя жо анокставить башка сменат уроз-эйдетнень, инвалидтнэнь, интернатсо эриця эйкакштнень, спортсментнэнь, активисттэнь, профилактикань учетсо аштиця эйдетнень туртов. Целанек тень лангс республикань бюджетстэ арсеви явомс 250 млн ламо целковойть. Теде башка, республикань правительствась тешкстась договорт федеральной шумбрачинь витемань лагертнесэ – «Артек», «Орленок», «Смена» - Мордовиянь эйкакштнень оймсемадост. Мордовиясо анокставить 1700 воспитательть ды тёжадо ламо вожатойть.
МР-ва Роспотребнадзоронь Управлениянь руководителенть Татьяна Харитоновань пачтямонзо коряс, эпидемиологиянь тевтнень мельсэ кирдезь те иень эйкакштнень оймсемась ютавтови башка ограничения марто. Невтемакс, отрядтнэсэ ды целанек лагертнесэ эйкакштнень пештемась карми 75% аволь седе ламо.
Артём Здунов макссь зярыя кармавтомат, конат токшить эйкакштнень шумбрачист витемань ды оймсемань сыця шкантень анокстамонть. «Васняяк, эряви вадрясто анокстамс оймсемань весе инфраструктуранть - пищеблоктнень, эрямонь, спортонь, шкинемань таркатнень. Ваннынк, штобу лагертнес улевель шождасто пачкодемс – эйакштненень, тетятненень-аватненень, инжетненень ды мероприятиятнень участниктненень», - мерсь Артём Здунов ды алтась, кизна сонсь моли эйкакштнень шумбрачист витемань лагертнес. Республикань руководителесь истя жо кармавтсь явомс башка мель эйкакштнень ютко шкаст ютавтомань программантень: «Оймсемась улезэ мельстуицякс ды лезэвекс. Тердеде содавикс ломанть – тевдеемань эрьва кодат ёнкстнэстэ, эйкакштне вастневест эсест профессиясо сехте вадрятнень марто, ды сменанть перть эрьва эйкакшось получазо вейке-кавто компетенцият. Невтемакс, тонадозо явомо медицинань васенце лезкс, анокстазо презентацият, тонадозо кортамо ламо ломантень икеле, мезеяк тееме эсензэ кедьсэнзэ, бути сменась ютавтови WorldSkills движениянть улеманзо марто». Артём Здунов истя жо кармавтсь вейсэндявомс эйкакштнень кизэнь оймсемаст анокстамонтень Мордовиянь госуниверситетэнть: «Тосо ламо педагогической ды студентэнь отрядт, сынст эряви нолдамс тевс».
Мордовиянь Прявтонь тевтнень топавтыцясь башка кортась эйкакштнень оймсемань сэтьмечинь кевкстематнеде. Ответственной лицятненень кармавтозь вадрясто ванномс сыця кизэнь кампаниянь весе пелькстнэнь, кавто недлянь ютазь Артём Здунов кунсолосы отчетонть.
Мордовия Республикань Прявтонть пресс-службась