Мордовия Республикань Прявтонь тевтнень нурька шкас топавтыцясь Артём Здунов сундерьковонь 25-це чистэ видеосвязенть вельде ютавтсть республикасонть коронавирусонь инфекциянть профилактикань ды седе тов а нолдамонь коряс оперативной штабонь промкс. Тосо ульнесть Правительствань членттнэ, властень федеральной органонь территориянь органтнэнь прявттнэ, райононь прявттнэ.
«Меельце штабсонть тешкстынь зярыя тевть, - ледстизе Мордовия Республикань Прявтонь тевтнень нурька шкас топавтыцясь, - течи эряви явомс тенст башка мель. Те лекарстватнень улемась – кода государственной, истя жо частной аптекатнесэ, госпитальтнесэ ды амбулаторной звенасонть. Кода пандовить медицинань важодицятненень федеральной ды республикань ярмактне. Ды, нама, кода явови медицинань лезксэсь, зярс сонзэ сави учомс. Весе кевкстематнень, конат сыть эрицятнень пельде, эрявить ванномс, ломантнень пшкадемаст – минек важодемасо прявтось!»
Промкссонть кунсолозельть региононь Минздравонь ды Роспотребнадзоронь представительтне, сынь тешкстызь, течинь чинтень ковидэнь госпитальтнесэ 2500 таркатнень эйстэ саезь 82,5%. Кода пачтясь Мордовиянь здравоохранениянь министрась Олег Маркин, истя жо весемесь анокстазь 100 таркас госпиталенть туртов: «Бути пецянень карми эрявомо, неть таркате улить панжозь».
Штабсонть башка кортамо ветявсь коронавируссо сэредицятненень лезксэнть шкастонзо явомадонть. Кудосо лецямонть туртов региононь эрицятнень улест лекарстват. «Лекарстватнень вешнемстэ ломантне иляст чийне вейке аптекасто лияс», - мерсь Артём Здунов. Ды кармавтсь правительствантень ютавтомс важодема Мордовиясо панжозь коммерческой покш аптекатнень марто.
Социальной сетнесэ ды МР-нь Прявтонь «пси линиянтень» сыть пеняцямот сень кувалма, ломантне зярыя часонь, лиясто зярыя чинь перть учить лезкс, тень кувалма Артём Здунов мерсь: «Бути ломанесь учи 9-10 част, арась возможность ней самс сонензэ (содатанок, врачтнэ а сатыть), эряви мартонзо сюлмавомс! Гайневтемс, кунсоломс, ёвтамс, мезе теемс ней ды зярдо сы врачось. Ломанесь чарькодезэ, зярдо сонензэ сы лезкс, ды содазо, сонзэ эзизь стувто!»
Мордовия Республикань Прявтонть пресс-службась