Артём Здунов кортась Гайдаронь форумонь площадкасонть

Артём Здунов кортась Гайдаронь форумонь площадкасонть

Мордовиянь Прявтось Артём Здунов якшамковонь 13-це чистэ ульнесь Московсо Гайдаронь форумонть важодемасо. Республикань руководителесь кортась «Научно-образовательные центры: надежда или головная боль региона» сессиясонть. Пелькстамосонть ульнесть РФ-нь Наукань ды высшей образованиянь министрась Валерий Фальков ды губернаторонь корпусонь представительтне. 

Ледстясынек, масторлангонь уровнянь научно-образовательной куншкакуротнень теемань коряс программам нолдазь тевс 2019 иестэнть масторонь Президентэнть Владимир Путинэнь мелензэ коряс. Течи сон вейсэнди 35 регионт, 150 вузт, 136 научной организацият ды малав 300 индустриальной партнёрт.

Наукань ды высшей образованиянь министрась тешкстызе, научно-образовательной куншкакуротне - те кувака цикла марто проектт, сынст тевдеемань цетавкстнэ редявить шкань ютазь, ансяк вадря ушодксось уш путозь, ды ули весемесь учомс сынст парсте топавтоманть. 

Мордовиясь - «Инженерия будущего» научно-образовательной куншкакуронь участник, конантень вейсэндязь 11 регионтнэнь покш вузтнэ, научной организациятне ды предприятиятне. Минек республикась прими участия научно-образовательной куншкакуронь 4 комтеттнэнь важодемасо: превей агро, альтернативной энергетика, медицинань технологият ды од материалт. Мордовиясь - «Умное агро» комттетэнть улемань-аштемань площадка. 

Мордовиянь Прявтось евтынзе эсензэ ванновтонзо научно-образовательной куншкакуротнень теемань смустенть коряс. "Бути минь эсенек продуктанть марто саинек рынканть, кастынек миемань покшолматнень, минек университеттнэс НОЦ-нь коряс сыть тонавтнеме омбо масторонь студентт - те невти: минь топавтынек икеленек путозь весе тевтнень", - тешкстызе Артём Здунов. 

Регионтнэнь ютксо вейсэнь вадря важодемань невтевксэкс евтазь Н.П.Огаревонь лемсэ МГУ-нть юрсо «Наука и университеты» национальной проектэнть лувсо од ломантнень лабораториянь теемась. 

Мордовиянь Прявтось истя жо тешкстызе: бути предприятиятне кармить университеттнэнь индустриальной партнерокс, сестэ касомань-кепетемань енксось кочказь видестэ, секс мекс производственниктне ловить те важодеманть эйсэ финансонь лезксэнть. 

"Минек «Инженерия будущего» научно-образовательной куншкакуросонть пек ламо индустриальной партнерт, те невти, НОЦ-сь топавты эсь тевензэ", - мерсь Мордовиянь руководителесь. 

«Инженерия будущего» НОЦ-нь партнертнэ - Россиянь государственной корпорациятне: «Ростех» ды «Роскосмос», истя жо «РЖД». Теде башка, НОЦ-нь партнертнэ кирдить кеме сюлмот 50 мастортнэстэ партнертнэнь марто. 

Сессиянь важодеманть лувсо кортавсть 2030 иенть самс научно-образовательной куншкакуротнень виевгавтомань енкстнэ. 

Мордовия Республикань Прявтонь пресс-службась