Форумонть ютавты Раськетнень тевест коряс федеральной агентствась, Россиянь Раськетнень кудось Россотрудничестванть ды Россиянь МИД-нть лезксэст пингстэ.
Мероприятиянтень пурнавозетненень пшкадсть Россиянь Президентэнь Администрациянь руководителень полавтыцясь Магомедсалам Магомедов, Раськетнень тевест коряс федеральной агентствань руководителесь Игорь Баринов.
Мордовиянь Прявтось Артём Здунов кортась форумонь пленарной промкссонть. Сон тешкстызе: минек регионось – раськетнень кеме ялгаксчинь невтевкс, республикасонть ояксчисэ эрить 90 раськетнень представительть.
Артём Здунов евтнесь республикасонть топавтовиця кавто ушодкстнэде, конат аравтозь демографиянь ды семиянь свалшкань питнейчитнень кемекстамонтень.
Сынст ютксто вейкесь - «Тонкая материя» проектэсь, сон анокстазь эйдень кужотнень туртов. «Минь сынек мельс: эряви ушодомс вишка шкасто саезь – евтнемс эйкакштненень евкстнэнь вельде, налксематнень вельде, кода кемекстави семиясонть вадря эрямось», – тешкстызе Мордовиянь Прявтось.
Истя жо республикасонть Стратегической инициативатнень агентстванть марто вейсэ нолдазь тевс «Здравствуй, мама» аватненень лездамонь коряс проектэсь – сон невтезель Россиянь Президентэнтень Владимир Путиннэнь ды совась «Сильные идеи для нового времени» мелень форумонь ТОП-10 сехте вадря ушодкстнэнь юткс. Те проектэнть вельде республикасонть удалась киртямс аборттнэнь.
Артём Здунов тешкстызе, республикась демографиянь стакачитнень вити весемеендо, государстванть, важодемань таркатнень максыцятнень ды общественной организациятнень марто вейсэ. «Минь кармавтынек важодемань таркатнень максыцятнень лездамс ламо эйкакшонь, од семиятненень – важодемань чинь вадря лувонть, башка льготатнень вельде, – евтнесь республикань Прявтось. – Кеман: зярдо весе важодить вейсэнь тевенть лезэс, те улияк общегосударственной политикань топавтома».
Артём Здунов истя жо тешкстызе эйкакш марто семиятнень туртов социальной лезксэнь тевтнень эрявиксчинть. Истя, сон мерсь, регионсонть ванстозь эйкакштнень чачомаст пингстэ ипотекань пельксэнь пандоманть лангс выплататне, нилеце эйкакшонть чачоманзо пингстэ мереви целанек пекстамс ипотеканть.
Меельце вете иетнень перть ламо эйкакшонь семиятне республикасонть ламолгадсть малав нилеце пельксэс. Ды эйкакш марто семиятненень лездамонь коряс важодемась ули поладозь.
Мордовия Республикань Прявтонь Пресс-службась