Мордовиянь Прявтонь тевтнень топавтыцясь Артём Здунов чадыковонь 9-це чистэ ютавтсь важодемань вастовома Саранск ошонь округонь прявтонть Пётр Тултаев марто. Кортавсть те иестэнть ды сыця шкастонть республикань прявтошонь общественной таркатнень вадрялгавтоманть-мазылгавтоманть кевкстематне.
Ошонь округонь прявтось пачтясь, «Формирование комфортной городской среды» федеральной проектэнть лувсо 2021 иестэнть тееви парк Т. Бибинань куросонть. Топавтозь законодательной весе процедуратне - ютавтозь торгт, тешкстазь муниципальной контракт. Анокстамонь тевтненень подрядной организациясь арси кундамс чадыковонь 15-це чистэнть. Строямонь весе тевтнень топавтсызь кизэнь ковтнень перть.
Те тарканть покшолмазо малав 2 гектарт. Строямонь тевтнень вейсэнь питнесь - 57,8 млн целковойть, сынст эйстэ 40 млн - федеральной бюджетстэ, меельце пельксэсь - ошонь бюджетэнь ярмактне.
Мордовиянь Прявтонь тевтнень топавтыцясь Артём Здунов тешкстызе: объектэнть социальной покш смустенть мельсэ кирдезь, эряви пштистэ ванномс ютавтовизе тевтнень вадрячист мельга.
Ошонь округонь прявтось истя жо пачтясь, 2021 иень якшамковонь 18-31-це читнестэ пурнавсть мельть-арсемат общественной таркатнень кочкамост коряс, конатне вадрялговтовить 2022 иестэ. Мордовиянь прявтошсо омбоце пельксэнтень ютасть колмо таркат: Гагаринэнь-Комаровонь куротнева Подольской курсанттнэнь скверэсь, Эрьзянь бульварось, Саранкань чиресь (Титовонь куростонть саезь Ботевградской куронть видьс). Кочкамонь меельце пельксэсь ютавтови 13.gorodsreda.ru федеральной порталсонть те иень чадыковонь 26-це чистэнть саезь панжиковонь 30-це чинть видьс. Се таркась, конась пурны сехте ламо вайгельть, витневи 2022 иестэнть «Формирование комфортной городской среды» федеральной проектэнть лувсо.
Мордовия Республикань Прявтонть пресс-службась