Артём Здунов вастовоманть ушодызе республикадонть, сонзэ социально-экономической башка енкстнэде евтнемастонть. Мордовиянь руководителесь тешкстызе региононь географиянь вадря тарканть, республиканть трокс чугункань китнень молеманть, спортонь ламо объекттнэнь улеманть. Мордовиянь Прявтось мерсь: эрицятнень ловозь спортонь объекттнэнь ламочинть коряс Мордовиясь саи Россиясо 1-це тарка.
Теде башка, регионось саи васенце таркат светотехникань производствасо, фармацевтикасо (коронавирусонь каршо ламо препараттнэ нолдавить Саранскойсэ), велень хозяйствасо, тонавтомань ды наукань тевдеемасо. Апак вано аволь покш средней зарплатанть лангс, Мордовиясо потребителень корзинань питнесь сехте алкине Равчирень федеральной округсонть. Неень кризистнэстэ республикась промышленно-гражданской строямонь темпатнень коряс сови Россиянь васенце колмо регионтнэнь юткс.
Теде башка, инвестортнэнень туить мельс коммунальной услугатнень ды модань эли помещениянь лангс аволь покш тарифтне (Равчирень лия регионтнэнь коряс).
«Сколково» клубонтень совицятне евтасть бажамо примамс участия Мордовиянь экономикань ды инфраструктурань виевгавтомасонть. Истя, республикань Прявтось кунсолынзе мельтнень-арсематнень «Мордовия Арена» стадиононь управлениянть, «Умный город» системань келейгавтоманть, велень хозяйствасо ванськавтомань сооружениятнень важодемасо од енкстнэнь тевс нолдамонть коряс.
Мордовия Республикань Прявтонь пресс-службась