Эйзюрковонь 25-це чистэ Мордовия Республикань Прявтонь тевтнень топавтыцясь Артём Здунов ёвтась поздоровт культурань важодицянь чинть кувалма актертнэнень ды артыцятненень, морыцятненень ды киштицятненень, республикань ансамблятнень, ДК-нь, музейтнень ды театратнень важодицятненень.
Кенярксчинь вастовомась ютавтвось Республикань культурань дворецсэнть Роспортребнадзоронь санитарно-эпидемиологиянь весе вешематнень топавтозь. МР-нь Прявтонь тевтнень топавтыцясь тешкстызе, артисттнэ вадрясто печтить пандемиянь варчавкстнэнь ды а валгстыть важодемань вадрячинть. «Тынь весе содатадо, кодамо стакачи марто минь вастовинек меельце иестэнть. Яван мель статистиканть лангс. Се медиаконтентэсь, конань тынь теинк Интернетсэ те нурька шканть перть, лездась а сеземс шкинемань ломантнень ды ваныцятнень ютксо вейсэнь тевдеемань сюлмонть. Культурань весе тевтнень, конатнень тынь путынк Интернетс, 25 миллиондо ламо ванномат – те пек покш важодема! Те невти, сюлмось апак ёмавто. Ней минь велявтанок ломантнень залтнэс, ды тень эряви теемс пек састо», - мерсь Артём Алексеевич.
Мордовиянь Прявтонь тевтнень топавтыцясь истя жо кортась регионсонть «Культура» нацпроектэнть топавтомадо. Меельце иетнестэ республикасонть педе пев витнезь райононь ды велень ламо ДК-т, рамазь оборудованият ды костюмт артисттнэнь туртов. Федеральной гранттнэнь вельде теевить раськень алкуксонь куншкакурот. «РФ-нь культурань министранть Ольга Любимовань марто аволь умонь вастовомасонть минь кортынек, темпанть аволь валгсынек, а ансяк покшолгавтсынек – те токши республикань районтнэсэ эрьва кодамо профилень культурань учреждениятнень. Минек туртов прявтокс ашти землячестватнень ды автономно-культурной вейсэндявкстнэнь марто сюлмотнень кирдемась. Эрьва раськенть ули правазо тиринь келенть ды культуранть виевгавтомаст коряс, минь тейтянок тень туртов весе условиятнень. Культурась – те минек музась. Косо сон арась, тосо а ули уцяскаяк. Икеле минек учить покш кенярксчить: «Шумбрат, Мордовия» 25-це фестивалесь, кизна топодить 20 иеть иневанькс праведной воинэнть Феодор Ушаковонь канонизациянтень. Прявт мероприятиятнень ютавтанок шкинемань профессиональной коллективтнень марто. Койтнень а полавтсынек, карматанок сынст поладомо ды кирдеме. Миненек эряви ютамс ве пильгсэ шканть марто – минек туртов те прявтось», - яволявтсь Артём Здунов.
Поздоровтнень ёвтамодост мейле Мордовия Республикань Прявтонь тевтнень топавтыцяясь явшесь отраслянь важодицятненень государственной наградат.
Мордовия Республикань Прявтонть пресс-службась