Мордовия Республикань Прявтонть тевтнень топавтыцясь Артём Здунов чадыковонь 16-це чистэ видеосвязенть вельде ютавтсь коронавирусонь инфекциянть профилактикань ды седе тов а нолдамонь коряс региононь оперативной штабонь промкс. Кортавсть эпидемиологиянь тевтне, COVID-19 каршо ливксэнь путомась, региононь шумбрачинь ванстомань системанть тевдеемась, санитарно-эпидемиологической вешематнень мельга ванномась.
Мордовия Республикань Прявтонть тевтнень топавтыцясь тешкстызе: республикасонть коронавирусонь инфекциясо сэредемась ванстови икелень уровнясо, меельце недлястонть чинь-вень перть редявить 35-37 од сэредицят.
Кода пачтясь вице-премьерэсь Галина Лотванова, ютазь недлянть коряс больницяв каязетне киртявсть 10%, больницясто нолдазетне жо ламолгадсть 25%. Лецямонь 7 учреждениятне важодить ковидэнь госпиталень лувсо, теезь инфекционной 705 таркат. Чадыковонь 16-це чинтень стационарсо ашти 491 ломань - те 100 ломанде седе аламо ютазь недлянть коряс.
Поладови коронавирусонь инфекциянть каршо эрицятненень ливксэнь путомась. Региононтень уш пачтязь 107 тежадо ламо вакцинань комплектт.
"Россиянь келес минь сехте вадрятнень ютксо ливксэнь путомань бойкачинть коряс, - тешкстызе Мордовиянь Прявтонть тевтнень топавтыцясь. - Федеральной уровнясо кортыть, таркасто таркас шаштневиця пункттнэнь ули лезэнь кандыця практикаст. Те лезды покшолгавтомс ливксэнь путомань темпатнень, эдь минсь сакшнотанок ломантненень".
Республикань руководителесь ледстизе: кавто недлят кадовить панжиковонь кенярксчитнес. Эпидемиологиянь тевтнень ды Роскомнадзоронь рекомендациятнень мельсэ кирдезь эряви кемекстамс панжиковонь 1-це ды 9-це читнень тешкстамонь мероприятиятнень лувонть, максомс рекомендацият организатортнэнень ды республикань эрицятненень.
Мордовия Республикань Прявтонть пресс-службась