Эйзюрковонь 23-це чистэ Саранскойсэ ушодовсь 13-14 иесэ цёрынькатнень ютксо боксонь коряс ПФО-нь Первенствась. 4 читнень перть пелькстасть 180 боксерт ПФО-нь весе 14 субъекттнэстэ. Медальтне максовсть сталмонь 16 категориятнень коряс.
Эйзюрковонь 27-це чистэ пелькстамотнень финалонтень ды изницятнень каземань кенярксчинь церемониянтень сакшнось Мордовиянь Прявтонь тевтнень топавтыцясь Артём Здунов. Почетонь инжетнень ютксо ульнесть ламо содавикс спортсмент, истя жо масторлангонь уровнянь! Те WBA ды IBF версиянь коряс сталмонь васенце категориясонть масторлангонь чемпионось Денис Лебедев, олимпийской чемпионось Гайдарбек Гайдарбеков, масторлангонь ды Европань чемпионтнэ - Василий Шишов ды Альберт Селимов, Россиянь боксонь Федерациянь председателень полавтыцясь, раськеютконь классонь мастерэсь Ахмедхан Адилов.
Артём Здуновонь тердеманзо коряс пекстамонь церемониянтень сакшнось Артур Бетербиевень ды Альберт Селимовонь тренерэст – боксонь коряс советской ды Россиянь тренерэсь, Россиянь заслуженной тренерэсь Нурипаша Мухтарович Талибов. Артур Бетербиев – Россиянь боксёр-профессионал, Россиянь спортонь заслуженной мастер, масторлангонь ды Европань чемпион, масторлангонь кубоконь изниця, IBF ды WBC версиянть коряс масторлангонь чемпион.
Покш инжетне лембестэ шумбракстнень Первенствань участниктнень ды инжетнень марто. Артём Здунов мерсь: «Кеман, течинь пелькстамотнень участниктне – те сы шкань чемпионт, конат невтсызь минек масторонть ды республиканть сехте покш пьедесталтнэсэ. Ды минь тейсынек весементь, республикасонть виевгадозо спортонь те видэсь!»
Видеозаписенть вельде пурнавозетненень пшкадсь Россиянь боксерось-профессионалось, минек землякось Олег Маскаев, конань лемезэ максозь боксонь коряс СШОР-нь, косо ютавтовить пелькстамот.
Церемониясонть башка мель явозель спортонь ветерантнэнень, тешкстазель, самай сынст бажамост вельде республикасонть ладязь боксонь секциятнень важодемаст, косо анокстазь кементь чемпионт. «Седейшкавань сюкпря тенк!» - мерсь Артём Здунов.
Денис Лебедев ды Гайдарбек Гайдарбеков марто республикань руководителесь казинзе од спортсментнэнь. Саранскойсэ пелькстамотнень изницятне понгить Россиянь Первенствань финалс, конась панжиковсто ютавтови Анапасо.
Мордовия Республикань Прявтонть пресс-службась