Мордовиянь Прявтонь тевтнень топавтыцясь Артём Здунов якшамковонь 21-це чистэ ютавсть коронавирусонь инфекциянть профилактикань ды седе тов а нолдамонь коряс оперативной штабонь промкс. Кортамось мольсь эпидемиологиянь тевтнеде, региононь шумбрачинь ванстомань системанть важодемадонзо, СОVID-19 каршо ливксэнь путомадонть, медицинань важодицятненень стимулирующей ярмактнень пандомадост, санитарно-эпидемиологиянь вешематнень топавтомадост.
Кода пачтясь вице-премьерэсь Галина Лотванова, меельце кавто недлятнень перть республикасонть редяви коронавирусонь марто сюлмавозь тевтнень вадря ёнов полавтомась: эрьва чистэ ормалгадыть седе аламо ломанть, больницятнесэ седе ламо чаво таркат – ней те 34,5%.
«Меельце колмо недлятнень перть больницяв каязетне киртявсть 24%, ды течинь чинтень минь киртинек инфекционной 180 таркат. Ней эряви ушодомс реабилитациянть сетнень туртов, кить печтизь коронавирусонь инфекциянть. Маласо шкастонть реабилитациянь таркат панжовить республикань госпиталенть юрсо ды республкиань лия медучреждениятнесэ», - тешкстызе вице-премьерэсь.
Мордовиянь Прявтонь тевтнень топавтыцясь мерсь, COVID-19 каршо бороцямосонть васенце таркас ней лиси эрицятненень ливксэнь путомась. «Масторонь Президентэнть кармавтоманзо коряс якшамковонь 18-це чистэнть саезь, кода тынь содатадо, ливксэнть мереви путомс ламот эрицятненень, - тешкстызе Артём Алексеевич. – Тесэ миненек весементь эряви парсте арсемс-анокстамс, иляст уле очередт, ливксэнь путомань пунктнэсэ иляст пурнаво ламо ломанть, седе келейсэ теде ёвтнемс эрицятненень, ломантне шожда сёрмадстовлизь пряст ливксэнь путомо».
Неень шкане ливксэнь путомо анокт 40 стационаронь ды 17 таркасто-таркас ардтниця пунктт. Маласо шкастонть республикав пачтявить вакцинань 27100 комплектт – те лезды ушодомс ливксэнь питневтеме путоманть сеть группатнень туртов, конатнень тешкстынзе Россиянь Минздравось: здравоохранениянь, образованиянь, социальной обслуживаниянь, ламо функциянь куншкакуронь важодицятненень, лексемань, седеень-санонь системань орматнесэ, сахаронь диабетсэ, эчкелгадомасо сэредицятненень. Ледстясынек, республикасонть 2742 ломанть уш путсть ливкст. Кода пачтясь С.В. Катковонь лемсэ больницянь поликлиникань прявтось Юлия Шеволаева, вакцинанть ломантне печтить вадрясто.
Республикань руководителесь явовтызе МР-нь Информатизациянь ды связень министранть Игорь Вольфсононь мелензэ теемс региононь эрицятненень доступ госуслугань порталонть вельде ливксэс сермадстомантень.
Мордовиянь Республикань Прявтонть пресс-службась