Ледстясынек, кенярксчись кемекстазь 2020 иестэнть Россиянь Президентэнть Владимир Путинэнь мелензэ коряс. Самай сестэ медицинань лезксэнь куроксто явомань службань важодицятнень лангс путозель покш сталмо, конась сюлмавозь коронавирусонь инфекциянь пандемиянть марто.
«Течи минь евтатано поздоровт службань ламот специалисттнэнень: врачтненень, фельдшертнэнень, медсестратненень, диспетчертнэнень ды машинань ветницятненень. Тынь васенцекс карматадо бороцямо стака орматнень каршо, явтадо лезкс ДТП-с ды апак учонь лия зыянов тевтнес понгозетненень. Ды кода куш кона покш тевсэнть - прявтокс ашти тевень ушодомась, секскак эрьва Од иесь ушодови тынк службастонть – коенть коряс мон сакшнан медицинань лезксэнь куроксто явомань станциянтень. Ломантне оймсить, ансяк медицинань лезксэнь куроксто явомань службась важоди свал – тынь аштетядо передовойсэнть», – пшкадсь пурнавозетненень Артём Здунов.
Сон тешкстызе, коронавирусонь пандемиясь тень вадрясто невтизе. Мордовиянь медицинань лезксэнь куроксто явомань службасонть важодить малав тежа ломанть. Весенень сыненст пандемиянть шкасто савсь важодемс эсь пряст апак вансто, весе виест макссть республикань эрицятнень шумбрачист ды эрямост ванстомантень. Службанть лангс путозь сталмось кассь зярыяксть – ансяк 2020 иень сундерьковсто тердематне ламолгадсть 5,5-ксть.
«Ней пандемиясь максы тенек аламос лекстямс. Те лездась велявтомс свалшкань важодемантень: ютавтомс витнемань тевть лецямонь учреждениятнесэ, косо ульнесть ковидэнь госпитальтне, путомс эрявикс оборудования, неть больницятне совасть федеральной программатнес. Карматано ветямо диспансеризациянть», – тешкстызе Артём Здунов.
Мордовиясо покш мель явови эрицятнень медицинань обслуживаниянтень: «Здравоохранение» нацпроектэнть лувсо ветяви поликлиникатнень витнемась, оборудованиянь рамамось, вете иетнень перть одкстомтозь автопаркось – республикав пачтязь 100 ламо од машинат. Панжозь республикань онкологиянь од поликлиникась ды эйкакшонь больницясь. Маласо шкастонть эйкакшонь од поликлиника строяви Рузаевкасо.
«Тынк важодемась пек стака! Медицинань васенце лезксэнть явомсто эрявить аволь ансяк профессиональной содамочить, истя жо эряви содамс психологиянть. Сюкпря тенк цидярдоманть ды весе вийтнень путоманть кисэ. Сюкпря важодеманк кисэ ды арсян ванстомс аволь ансяк пациенттнэнь шумбрачист, истя жо эсенк ды тынк семиятнень!» – мерсь Мордовиянь Прявтось.
Республикань Прявтось явшесь государственной наградат республикань медицинань лезксэнь куроксто явомань службань эрьва кодамо енксонь специалисттнэнень: «За самоотверженный труд» отличиянь тешкст, Мордовия Республикань Прчетонь Грамотат ды МР-нь Прявтонь Благодарностть. «Заслуженный врач Республики Мордовия» лемесь максозь Саранскоень Медицинань лезксэнь куроксто явомань станциянь подстанциянь заведующеентень Светлана Аникинанень ды Саранскоень Медицинань лезксэнь куроксто явомань станциянь врачонтень Ольга Елховикованень.
Медицинань лезксэнь куроксто явомань службасонть Светлана Аникина врачось важоди 30 иеть, тешкстызе: «Важодемань иетнень перть мон вестькак эзинь янксе кочказь кинть кувалма. Весемесь секс, лавтовдо лавтовс монь марто свал важодсть покш профессионалт, конат свал анокт лездамс».
«Заслуженный работник здравоохранения Республики Мордовия» почетонь лемесь максозь Орданьбуень ды Теньгушевань райононь больницятнень медицинань лезксэнь куроксто явомань службань фельдшертнэнень Татьяна Иванованень ды Елена Кошелеванень.
Мордовиянь Шумбрачинь ванстомань министрась Олег Маркин мерсь: «Кавто иетнень перть медицинань лезксэнь куроксто явомань бригадатне якасть малав 500 тежат тердематнес, эрьва колмоцесь ульнесь ковидэнь. Сюкпря тенк, коллегат, профессиянтень кемевиксчинть, тынк панжадо ойметнень кисэ!»
Медицинань лезксэнь куроксто явомань службань важодицятненень наградат истя жо явшесть Мордовия Республикань Правительстванть, Госсобраниянть, Шумбрачинь ванстомань министерстванть ды Мордовиянь врачтень региононь ассоциациянть пельде.
Мордовия Республикань Прявтонь пресс-службась