«Местной самоуправлениясь свал ульнесь юрокс, конань лангс нежеди весе государствась, – тешкстызе региононь руководителесь. – Самай тесэ тешкставить сехте талновтыця кевкстематне, конатнень витемаст эйстэ а туят, а кекшсы сельметь. Сень эйстэ, кода важоди управлениянь сехте «модань» уровнясь, ашти ломантнень ежост».
Мордовиянь Прявтось тешкстызе, муниципальной уровнянть лангс путозь тевтне призывень комиссиятнень важодемаст ладямонь, контрактонь коряс военной службас эрицятнень кочкамосо лездамонь, специальной военной операциянь участниктнень семиятнень кирдемань коряс.
«Евтан сюкпря тынк ютксто эрьвантень минек масторонь кирдеманть кисэ: минь невтинек сонзэ РФ-нь Президентэнь кочкамонь чистэнть. Минь вейсэ, минь минек Президентэнть кисэ!» – мерсь республикань руководителесь.
Истя жо тешкстазель, тевтнень ламолгавтомаст марто вейсэ касы муниципальной службань таликась. Течи республикань местной самоуправлениянь органтнэсэ важодить 5 тежадо седе ламо ломанть. Россиянь неень шкань историясо васенцеде муниципальной енксонь важодицятнень ули эсест наградаст, сон кемекстазь Россиянь Президентэнть кармавтоманзо коряс - «Заслуженный работник местного самоуправления» почетонь лемесь. Васенцетнень ютксто те лемесь максозь Юрий Нечайкиннэнь – Темниковань енксонь Бабеевской велень поселениянь прявтонтень.
Сы иестэнть саезь масторсонть ушодови национальной вете од проекттнэнь топавтомась. Республикань Прявтось тешкстызе, муниципалитеттнэнь икелев путовиця ламот тевтнень финансонь юронтень питне максы региононь властесь. Тень кувалма Артём Здунов явовтызе МР-нь Госсобраниянь меленть местной самоуправлениянь органтнэнь кирдемань эрявиксчинть лангс. Уш важодиця инструменттнэнь ютксо вейкесь - «Лучший муниципальный служащий» эрьва иень пелькстамось. Тедеде пелькстамонтень понгоманть туртов яволявтоматне ламолгадсть малав 1,5-ксть.
«Минь карматано свал нежедеме тынк лангс, а тынь кемеде минек лангс. Сехте прявтось – местной самоуправлениянь органтнэсэ важодить мелень явиця, виень а ванстыця ды профессиональной ломанть. Евтан тенк поздоровт кенярксчинть кувалма!» – пшкадсь пурнавозетненень Артём Здунов.
Мордовиянь Прявтось явшесь покш наградат. Истя, Россиянь Президентэнь Почетонь грамотасо казезь Покш Березникень енксонь Симкина велень поселениянь прявтось Любовь Астайкина ды Ицялонь енксонь прявтось Валентина Дмитриева, РФ-нь Президентэнь Благодарностесэ – Ельникень енксонь Новоямской велень поселениянь прявтось Светлана Гришакина, Торбеева енксонь Красноармейской велень поселениянь прявтонь полавтыцясь Татьяна Давыдкина ды Дубенкань енксонь Красина велень поселениянь администрациянь прявтонь полавтыцясь Вера Титяева.
Истя жо евтазь «Лучший муниципальный служащий» республикань эрьва иень пелькстамонь невтевкстнэ. «Жилищно-коммунальное хозяйство, благоустройство населенных пунктов, системы жизнеобеспечения» номинациясонть изницякс кармась Лямбирь енксонь прявтонь полавтыцясь Алексей Цилин, «Социальное развитие» номинациясонть – Ташто Шайгова енксонь прявтонь полавтыцясь Наталья Жевлакова, «Управление, экономика и финансы» номинациясонть – Дубенка енксонь администрациянь ули-паронь ды модань отношениятнень коряс управлениянь прявтось Лариса Карпова, «Профилактика терроризма и экстремизма, организация мероприятий по территориальной и ГО, мобилизационной подготовке и ликвидации последствий ЧС» номинациясонть – Зубова-Полянань енксонь администрациянь ГО-нь тевтнень ды ЧС-нь коряс отделэнь прявтось Маргарита Тюркина, «Правовое обеспечение» номинациясонть – Ицялонь енксонь Оброчное велень поселениянь прявтось Татьяна Анохина, «Организационное и кадровое обеспечение» номинациясонть – Саранскоень Ленинской енксонь администрациянь прявтонь полавтыцясь Наталья Вадяева.
«Совет муниципальных образований Республики Мордовия» Ассоциациянь председателесь, Дубенкань енксонь прявтось Виктор Нефедов евтась сюкпря республикань руководствантень местной самоуправлениянь енксонтень лездамонть кисэ, велетнень ды оштнень виевгавтомаст кисэ. Сон истя жо тешкстызе: «Местной самоуправлениянть лангс путови сехте ответственной важодемась – миненек эряви улемс панжадокс минек ломантнень туртов, улемс республикань ды федеральной центрань весе проекттнэсэ, сы шкасто ломантнень эрямост улезэ седе вадрякс».
Мордовия Республикань Прявтонь пресс-службась