Чадыковонь 10-це чистэ матчонть мейле ютавтозь пресс-конференциясонть Мордовиянь сборноень командань ды "Амкал" футболонь клубонь налксицятне ды тренертнэ евтызь налксемань итогтнень. Журналисттнэ кевкстнесть Мордовиянь футболонть вандынь чидензэ.
Артём Здунов тешкстызе, апак вано пертьпельксэнть лангс, налксемс ульнесь шожда, паксясь пек вадря. Ледстясынек, весе матчонть перть валсь пиземе, ушосонть ульнесь 5 градуст лембе. Ютавтозельть 45 минутань кавто матчт ды чавозельть пенальтить. Мордовиянь Прявтонь тевтнень топавтыцясь евтась сюкпря соперниктненень ды Мордовиянь сборноень налксицятненень, истя жо спортонь те кенярксчинть анокстыцятненень ды участниктненень, весемесь, нама, удалась!
"Амкал" клубонь пурныцясь Герман Попков тешкстызе, те сонзэ команданть васенце налксемазо истямо уровнянь стадионсо. "Евтатанок сюкпря Артём Алексеевичнень истямо стадионсо налксемс возможностенть кисэ, косо ютавтовсть футболонь коряс масторлангонь чемпионатонь матчтне. Теде минь арсинек 3 иень перть. Минь тейтянок вадря роликть те матчстонть. Футболонть ваномо састь ламо ломанть. Интернетсэ видеонть вансызь седеяк ламот", - мерсь El Classico блогерэсь. Самай Саранскойсэ путозь рекорд - налксеманть ваномо састь 9610 ломанть.
"Амкалонь" налксицятне истя жо евтасть сюкпря анокстыцятненень вейке паксясо футболонь тештетнень марто матчонь ютавтоманть кисэ. Мордовиянь сборноенть кисэ налксесть "Спартаконь" легендатне Егор Титов ды Дмитрий Аленичев. Сынь тешкстызь, налксеманть вадрясто анокстамонть. Ды мерсть, ошонть улить весе возможностензэ профессиональной футболонть виевгавтоманзо туртов.
Мордовиянь Прявтонь тевтнень топавтыцянть кевкстизь Мордовиясо профессиональной клубонть теемадонзо. "Сави ламо теемс Мордовиясо футболонть вельмевтемга. Минь ней тень коряс важодтянок. Арсян, весе республикась, эрьва районось налксезэ футболсо. Эряви ютавтомс чемпионатт. Бути весе кармить явомо мель, сестэ футболось карми мазыекс, сестэ минек весемесь лиси. Минь карматанок важодеме футболонть виевгавтомга", - яволявтсь Артём Алексеевич Здунов.
Матчсонть ды пресс-конференциясонть истя жо ульнесь пляжонь футболонь коряс Россиянь сборноень прявт тренерэсь Михаил Лихачев. Сон мерсь, Мордовиянть ули весемесь спортонь те видэнть туртов полноценной базанть получамга. Ветявить кортамот команданть пурнамодонзо.
Мордовия Республикань Прявтонть пресс-службась