Даволковонь 20-це чистэ Республикань Кудосонть ютавтовсь кенярксчинь промкс, конась алтазель Тиринь масторонь ванстыцянь чинтень. Мордовиянь Прявтонь тевтнень топавтыцясь Артём Здунов ёвтась поздоровт кенярксчинь промксонтень пурнавозетненень, сынст ютксо ульнесть эрьва кодамо профессиянь представительтне, конат топавтыть масторонь ванстоманть, гражданской оборонанть, общественной сэтьмечинть, од ломантнень патриотизмань лувсо кастоманть.
«Минек масторось кирди каштанчи а пелиця воинэнзэ кувалма. Воинской ине койтне, минек покштятнень подвигест кисэ каштанчись, лездыть молемс икелев ды изнямс, - мерсь республикань руководителесь. – Сюконятанок Ине Отечественной войнань геройтнень икеле. Ризксэс, минек марто кадовсть аламо фронтовикть, ансяк ине Изнямодонть ванькс ледстнематне эрить эрьва семиясонть. Покш талика тенесэ саить од ломатне – вешнемань движениянь участниктне, юнармеецтнэ, кадеттнэ, казактне, волонтёртнэ».
Сюкпрянь башка валт Мордовиянь руководителесь ёвтась воинтнэнень-профессионалтнэнень, кадровой офицертнэнень ды сеттненень, кить аштить боевой постонть лангсо.
Мордовиясто 2500 ламо солдатт-срочникть ды контрактникть честь марто кандыть службаст Россиянь армиясо. Малав 500 курсантт ютыть тонавтома военной тонавтнемань заведениятнесэ. Кенярксчинь промксонь участниктнень ютксо ульнесть Ковылкинань ошонь войсковой частень командованиясь – тосо панжозь радиолокационной станциясь топавты масторонь коштонь-космосонь вельтямонть.
Вастовоманть лувсо казевсть государственной наградат. Отечественной войнань II степенень орденэнтень удостоверениясь, конасонть куломадонзо мейле казезь Ефим Терентьевич Артюшин, сон чачсь Мордовиянь АССР-нь Мельцанской районсо, пачтязь нуцьканстэнзэ Марина Олеговна Крылованень.
«Ванстовсь Ефим Терентьевичень меельце сермазо, конань сон кучизе фронтсто 1944 иень панжиковонь 30-це чистэ. Сон сёрмады малавикстнэнень, сонзэ весемесь вадря. Ансяк аштемковонь 23-це чистэ Ефим Терентьевич маштови тюремасо, Ленинградонь областень Псковской районсо. Эсь подвигенть кисэ сон казезь Отечественнйо войнань II степенень орденсэ (куломадонзо мейле). Весе неть иетнень перть наградась ульнесь апак максо. Фронтовикенть цёранзо вешнеманзо вельде муезельть документтнэ. Сюкпря весенень, кить важодсть тень лангсо», - мерсь Артём Здунов.
Казнесэ истя жо тешкстазь афганской войнань, Кавказсо боевой тевдеематнень ды военной лия операциятнень ветерантнэ, правань ванстомань органтнэнь, толонь мадстемань-идемань службань сотрудниктне.
«Отечествань ванстыцянь чинть кувалма весень – те кенярксчись ледсти, минь мускула марто ды аноктанок куш-кодат тердематненень. Кадык минек Тиринь масторонть велькссэ свал карми ванькс ды сэтьме менель! Часия тыненк ды малавиксэнк туртов, шумбрачи ды паро эрямо!» - мерсь Мордовия Республикань Прявтонь тевтнень топавтыцясь.
Кенярксчинь промксонтень пурнавозетненень поздоровт истя жо ёвтась Мордовиянь военной комиссарось Игорь Тихомиров. Властень органтнэнь, военной комиссариаттнэнь ды общественностенть вейсэнь важодеманть вельде республикань призывниктнень анокчинь невтевксэсь течи 80% ламо.
Мордовия Республикань Прявтонть пресс-службась