Мордовиянь Прявтось Артём Здунов ацамковонь 8-це чистэ видеосвязенть вельде ульнесь РФ-нь Госсоветэнь «Образование» енксонть коряс комиссиянь промкссонть. Кортавсть школатнень педе пев витнемань коряс федеральной программаь топавтомань кевкстематне, сон ушодови 2022 иень якшамковсто.
Ледстясынек, те программась анокстазь масторонь Президентэнть Владимир Путинэнь кармавтоманзо коряс, конась яволявтозь «Единая Россия» партиянь инекужосонть. Программась арсезь вете иес: школатне аволь ансяк педе пев витневить, истя жо путови неень шкань оборудования. Весемезэ 2026 иентень арсеви витнемс 7 300 школат.
Мордовиясо педе пев витнемань программантень маласо 2 иетнес совась 21 школа Саранскойстэ ды республикань районтнэстэ - неть тевтнес явовить ярмакт федеральной ды республикань бюджеттнэстэ.
Промкссонть кортасть, кода моли педе пев витнемантень анокстамось. Мордовиянь руководителесь тешкстызе, программанть вельде арсеви вадрялгавтомс тонавтнемань весе среданть. "Минь вадрясто анокстатано те программантень. Сон сехте пек эряви велень школатненень, - тешкстызе Артём Здунов. - Эряви теемс весементь, витнемадо мейле школатне улест вадрят эйкакштнень, тонавтомань ды воспитательной процессэнть туртов".
Мордовия Республикань Прявтонь пресс-службась