Мордовиянь Прявтонть тевтнень топавтыцясь Артём Здунов чадыковонь 15-це чистэ ютавтсь регионсонть промышленной продукциянь аволь закононь коряс оборотонть а нолдамонь коряс комиссиянь промкс. Тосо ульнесть властень федеральной органтнэнь территориальной органтнэнь, республикань министерстватнень ды ведомстватнень, виень структуратнень руководительтне. Кортавсть тевтне, конат кемекставить коронавирусонь инфекциянть шкасто контрафактонь ды фальсифицированной лекарствань препараттнэнь ды медицинань теевкстнэнь микшнеманть а нолдамга. Те енкссо важодемадонть пачтясть МР-ва Росздравнадзоронь территориальной органонь, Мордовиянь Минздравонь, МР-ва МВД-нь представительтне.
Республикань руководителесь пачтясь: лезэв ды аволь питней лекарствань средстватнень рамсицятненень пачтямось - национальной безопасностень прявт вешемастнестэ вейкесь. Асатыця ванноманть пингстэ лекарствань препараттнэнь фальсификациясь канды покш зыян ломантнень шумбрачист ды эрямост туртов. Масторлангонь прибыльностень статистиканть коряс фармацевтикань "сулеень" рынкась ашти колмоце таркасо оружиянть ды наркотиктнеде мейле.
"Меельце иетнестэ РФ-сэ кемекстазь башка тевть фальсифицированной лекарствань средстватнень ды медицинань теевкстнэнь оборотонть каршо бороцямга, - мерсь Мордовиянь Прявтонть тевтнень топавтыцясь. - Зярс эзь удала саемс ванновт алов Интернетсэ пачтицятнень ды микшницятнень. Сынь микшнить фармацевтикань продукция, медицинань оборудования. Тесэ ванныця органтнэнень стака важодемс - стака муемс производителень адресэнть, сонзэ марто сюлмонть. Меельце иетнестэ минь анокстынек башка лувт, секскак важодеманть поладсынек. Эряви путомс пирявкс контрафактонтень ды ванстомс ломантнень эрямост ды шумбрачист!"
Башка тешкстазь велетнесэ аптекатнень ды ФАП-нь панжоманть, тосо товаронь ассортиментэнь ламолгавтоманть коряс тевтнень эрявиксчись. Те лезды киртямс аволь вадря качествань лекарствань средстватнень рамамонь тандавкстнэнь, истя жо интернет-рамамотнень вельде.
Мордовия Республикань Прявтонть пресс-службась