Мордовиянь Прявтонь тевтнень топавтыцясь Артём Здунов чадыковонь 1-це чистэ ВКС-нь лувсо ютавтсь коронавирусонь инфекциянть профилактикань ды седе тов а нолдамонь коряс оперативной штабонь промкс. Кортасть эпидемиологиянь тевтнеде, COVID-19 каршо ливксэнь путомадонть, региононь шумбрачинь ванстомань системанть важодемадонзо, санитарно-эпидемиологиянь вешематнень топавтомаст мельга ванномадонть.
Республикань руководителесь тешкстызе: ютазь недлястонть Мордовиясо коронавирусонь инфекциясо сэредемась ванстовсь икелень уровнясо: малав 40 од сэредицят чинь-вень перть. Тешкстави пациенттнэнь аволь покш касомась ковидэнь госпитальтнесэ. Те сюламовзь сень марто, 60 иеде седе сыре сэредицятненень ды лицятненень, кинь улить хронической ормаст, ней мереви мадемс больницяв орманть шождасто молеманть пингстэяк. Те лезды а нолдамс орманть стакалгадомантень.
Чадыковонь 1-це чинтень республикасонть теезь 725 ковидэнь таркат лецямонь 7 учреждениятнесэ. 577 ломанть аштить стационартнэсэ. Чаво аштить 20% таркатне. Понедельникстэ важодемань свалшкань лувонтень велявтови 4№ РКБ-нь терапиянь корпусось.
Эрязасто поладови коронавирусонь инфекциянть каршо эрицятненень ливксэнь путомась. Кода пачтясь республикань Правительствань вице-премьерэсь Галина Лотванова, уш течи учовить вакцинань 33 700 комплект. Чадыковонь перть кармить эштё пачтямот.
«Минздравонтень эряви кемекстамс тевть ливксэнь путомань пунктнэсэ седе ламо ломантнень нолдамонть туртов. Тешкстазь аравтлув, ливкст эряви путомс 60% эрицятненень. Минек туртов те иммунной ванстома. Тееде ливксэнь путовтомо куроксто сёрмадстома Госуслугатнень порталсонть. Ды, нама, поладынк кулянь максомань кампаниянть», - пшкадсь республикань Прявтонь тевтнень топавтыцясь Правительствантень.
Сыре ломантнень ютксо сэредицятнень ламолгадоманть мельсэ кирдезь оперштабонь промкссо кемекстазель поладомс 65 иеде седе сыретнень туртов больничнойтнень панжиковонь 1-це чинть самс.
МР-ва санитарной прявт врачось Татьяна Харитонова пачтямосонзо явсь мель педиця стака орматнень а нолдамга парктнень ды сквертнэнь порицятнень эйстэ порксеманть лангс. Мордовиянь Прявтонь тевтнень топавтыцясь кармавтсь муниципалитеттнэнь прявттнэнень теемс тень панжиковонь 1-це чинтень.
Мордовия Республикань Прявтонть пресс-службась