Отраслянь представительтненень поздоровт евтась Мордовия Республикань Прявтось Артём Здунов. «Мордовиясь кадови светотехнической промышленностень прявт куншкакурокс ды валдонь прявтошокс. Седейшкава евтан сюкпря светотехникень ветерантнэнь ламот поколениятненень, важодемань династиятненень, инженертнэнень, важодицятненень, наукань деятельтненень, весе специалисттнэнень, кие топавты те покш цетавксонть. Арсян весенень кеме шумбрачи, паро эрямо, изнявкст важодемасо ды весементь сехте паронть», – мерсь региононь лидерэсь.
Артём Здунов тешкстызе, Мордовиясо теезь научно-производственной комплекс. Сонзэ арсеналсо – лиятнень енов а молиця теевкст, конатнень арасть аналогост Россиясо ды омбо мастортнэсэ. Республикась васенце масторсонть промышленной производствань вейсэнь покшолмасонть инновациянь продукциянь пельксэнть коряс ды покш пельксэсь – самай светотехнической продукция. Ютазь иенть перть электрической оборудованиянь производствань покшолматне кассть 22% ды кармасть 61 млрд целковойть.
Те иесь – юбилеень республикань сеске кавто флагмантнэнь туртов – 75 иетнень тешкстасызь «Лисма» ды «Ардатовский светотехнический завод».
«Завод световых приборов» марто вейсэ топавтови проект импортонь полавтыця светотехнической продукциянь массовой производствань ладямонть коряс. Редявикс путовкс отраслянь виевгавтомантень теить вишка предприятиятне, сынст ютксто мереви тешкстамс «Рефлакс-С». Те покш давлениянь газоразрядной лампатнень Россиянь вейкине производитель. Ютазь иенть перть предприятиясь кастынзе производствань покшолматнень 67%, инновациянь продукциясь кассь ниледе седе ламос.
«Мельспаро, минек ули питнейчинь парго - А.Н. Лодыгинэнь лемсэ валдонь источникень Научно-исследовательской институтось. Мордовиясь нежеди науканть лангс, миненек мереви покшолгавтомс инновациянь продукциянть, ды виевгавтомс башка экономической зонанть», – мерсь Артём Здунов.
Профессиональной кенярксчинть кувалма Мордовиянь светотехниктненень поздоровт истя жо евтась МР-нь Госсобраниянь Председателесь Владимир Чибиркин ды МР-нь Правительствань Председателень полавтыцясь Батыр Эмеев. Отраслянь сехте вадря важодицятненень явшесть государственной наградат.