Эйзюрковонь 31-це чистэ Мордовиянь Прявтонь тевтнень топавтыцясь Артём Здунов ВКС-нь лувсо ульнесь МР-нь Промышленностень, наукань ды од технологиятнень министерствань коллегиясонть. Промкссонть кортась Россиянь Промышленностень ды микшнемань министерствань Региононь промышленной политикань ды проектэнь управлениянь департаментэнь прявтось Виталий Хоценко, региононь отраслянь министерствань представительтне, республикань покш производствань прявттнэ ёвтызь иень перть важодемань невтевкстнэнь.
Артём Здунов явсь мель сень лангс, промышленностесэнть важодить регионсонть весе важодицятнень эйстэ нилеце пельксэсь, те республикань экономикань флагмантнэстэ вейкесь. Мордовиянь Прявтонь тевтнень топавтыцясь тешкстынзе зярыя кевкстематнень, конатнень эряви домкасто ванномс коллегиясонть. Васняяк – предприятиятнень азорксчинь ды управлениянь кевкстематне. Стакачикс карми азорксчинь праватнень секе тев полавтомась, те меши предприятиятнень виевгавтомантень. Эштё вейке прявт ёнксось – предприятиятнень сбытэнь стратегиятнень топавтомась. Минпромонтень кармавтозь лездамс заводтнэнень неть кевкстематнень витемасо.
«Невтемакс, Саранскоень телевизионной заводось. Пачтязь кулянть коряс, зярыя кармавтоматнень арсить ютавтомс лия региононь площадкас – ды тенесэ миненек а эряви кадовомс ве ёно. Ули важодицянь коллектив, текень пингстэ ёмавтовить кармавтоматне, - ёвтынзе талноманзо Мордовиянь Прявтонь тевтнень топавтыцясь. – Ансяк Минпромонть пельде мон кодаткак гайневтемат зярс эзинь маря, а эдь эряви витемс тевтнень, кортамс те предприятиянть од азортнэнь марто вейсэнь важодемань кевкстематнеде».
Региононь руководителесь истя жо кармавтсь отраслянь министерствантень ванномс «Электровыпрямителень» управлениянь системанть ды сонзэ сбытэнь стратегиянть. Те истя жо кандови «Лисмантень» - предприятиянть производствань покш инфраструктуразо, ансяк касома-кепетема зярс арась. Региононь руководителесь истя жо явсь мель «Ламзурень» касомань-кепетемань стратегиянть лангс. Кондитерской фабрикасонть уш умок финансонь стакачить, текень пингстэ свалшкане явовить бюджетэнь дотацият. «Те сеть предприятиятнестэ вейкесь, конатненень свал эряви финансонь лезкс. Тов явозь покш ярмакт, ансяк фабрикась свал ашти кризиссэ. Мезе тосо моли – ваннык, неть тевтнестэ эряви лисемс», - кармавтсь Артём Здунов.
Эштё вейке структурась, конань эряви домкасто ванномс, - МР-нь Виевгавтомань корпорациясь. Мордовиянь Прявтонь тевтнень топавтыцясь кармавтсь ютавтомс инвентаризация: зяро средстват тов явозь, кода сынь велявтовить, кода важодить предприятиятне господдержканть получамодонзо мейле.
Теде башка, Артём Здунов тешкстызе виевгадомо анок предприятиятнень производствань од площадкатнень туртов инфраструктурань явомань эрявиксчинть. Те «Биохимик», суликань заводось ды зярыя лият. Минпромонтень эряви кирдемс те кевкстеманть свалшкань ванновт ало, иляст уле кодаткак кирдемат од инвестпроекттнэнь топавтомсто. Республикань руководителесь башка кортась промышленной предприятиятнесэ зарплатанть кастомадонзо, истя жо кармавтсь ванномс, мезе теить азортнэ эсест важодицятнень эрямост вадрялгавтоманть коряс.
Мордовия Республикань Прявтонть пресс-службась